א מאסיווע אויל-גיסונג פון א געשעדיגטע טאנקיר שיף האט דערגרייכט די בארטנס פון די פאראייניגטע אראבישע עמיראטן (UAE), וואס האט געצווינגען די לאקאלע אויטאריטעטן צו פארמאכן די ביטשעס אין 'אום אל קוויין' און אין די ארומיגע עמיראטן. די ענווייראמענט מיניסטעריום האט געמאלדן אקטאבער 23 אז זייערע מאניטארינג סיסטעמען האבן אויפגעכאפט דעם ריס, און מען האט תיכף אפגעשפארט אלע ביטשעס און בארטן-זאנעס אין אום אל קוויין.

אלס א פראקאוציע שריט האט די שטאט 'שארדזשע' פארמאכט די 'אל חמריה' ביטש, און 'ראס אל כיימע' האט שפעטער געמאלדן אז אלע אירע ביטשעס וועלן בלייבן פארמאכט ביז א ווייטערדיגע מעלדונג. כאטש די אפיציעלע באאמטע האבן נישט ארויסגעגעבן דעם נאמען פונעם שיף, צייגן אנאליסטן און עקספערטן אן אויף די "דזשעם נומער 2" (Gem No.2) טאנקיר, וואס איז לויט באריכטן געטראפן געווארן דורך אן אומאידענטיפיצירטע פראדזשעקטייל אקטאבער 9, ארום 13 ים-מייל פונעם בארטן נעבן 'אל דזשאזירא'.

ווידעא קליפס פונעם בארטן צייגן ווי קלינאפ ארבייטער אנגעטוהן אין ספעציעלע שוץ-קליידער שארן אוועק די שווארצע אויל פון די זאמדיגע ביטשעס און פונעם פלאכן וואסער, מיט שווערע עקוויפמענט אויפגעשטעלט נעבן די שטיינערדיגע ברעגעס אונטער א פארוואלקנטע הימל.

סעטעלייט בילדער צייגן אז די אויל פלעק האט זיך צעשפרייט פון ארום 180 ביז 750 סקווער קילאמעטער זינט אנהייב אקטאבער. דאס ברענגט ארויף ערנסטע זארגן פאר די ים-לעבן און הויפטזעכטליך פאר די וואסער פלאנטס וואס פילטערן דעם ים וואסער און שטעלן צו א גרויסע טייל פון די טרינק-וואסער פאר די איינוואוינער. די מיניסטעריום זאגט אז דער שווערער גערוך וואס ווערט געשפירט דורך איינוואוינער אין אום אל קוויין, שארדזשע און 'אדזשמאן' שטעלט נישט פאר קיין געזונט סכנה, און די ביטשעס זענען בלויז פארמאכט אלס א פראקאוציע.

די רייניגונג ארבעט האט זיך אנגעהויבן זאפארט, אבער עס איז נאך נישט געגעבן געווארן קיין דאטום ווען די ביטשעס וועלן זיך צוריק עפענען. דער אינצידענט קומט אין א צייט וואס שיפן אין די גאלף וואסערן ווערן כסדר אטאקירט צוליב די אנגייענדע מלחמה אין מיטל מזרח, כאטש די אויטאריטעטן האבן נאך נישט אפיציעל באשטעטיגט וואס האט פאראורזאכט דעם ריס. דערווייל בלייבן די איינוואוינער און טוריסטן מיט די פראגע ווי ווייט די אויל וועט זיך נאך צעשפרייטן און ווי לאנג די ביטשעס וועלן בלייבן אפגעשפארט.