אויסצוג פונעם דרשה פון הגה"צ אבדק"ק ור"מ סאטמאר וויליאמסבורג שליט"א נעכטן ביים דרשת שבת שובה אצל עצרת רבתי בהיכל בית המדרש הגדול ד'סאטמאר אין וויליאמסבורג, וואו דער רב געט איבער פייעריגע ווערטער בחובת השעה בעניני ציונות:

מיר זענען תלמידים וחסידים פון אונזערע הייליגע רבי'ס וואס האבן אונז מדריך געווען און מגדל געווען, ס'איז ליידער ליידער היינט א שווערע מצב אויף דער וועלט, בפרט אויף אחינו תושבי ארץ ישראל, פון פאריאר שמחת תורה פון די שרעקליכע שחיטה רחמנא לצלן ביז יעצט זענען אסאך זאכן דורכגעגאנגען דארטן אויף אחינו בני ישראל,

אבער אין די לעצטערע צוויי דריי וואכן ווען די ציונים טוען טראמפייטערן מיט געוויסע זאכן וואס קוקט אויס ווי א הצלחה, דאס האט א מורא'דיגע כח אריינצודרינגען אין אידישע הערצער, אפי' אידישע קינדער וואס האבן געלערנט ויואל משה מיט על הגאולה, און מען איז אויפגעוואקסן אין דעם חדר,

איך וויל ענק זאגן טייערע אידן, ווען די נאציס ימח שמם וואלטן ווען געהאט א הצלחה וואלט קיינער נישט גענומען און אויסגעברייטערט און געמאכט פון דעם אן עסק,

מיר דארפן צו וויסן 'גדול המחטיאו יותר מן ההורגו',

וויפיל חורבנות דאס האט שוין אנגעווערטשאפט פאר כלל ישראל, און ווען מען זאל נעמען אלע עבירות פון כל התורה כולה און לייגן אויף איין זייט וואגשאל, און נעמען די מדינה הציונות אויף די אנדערע זייט וואגשאל וואלט דעיס איבערגעוואויגן, מען קען נישט און מען טאר זיך נישט פרייען, און מען טאר נישט ארויסברענגן לשבח אויף בכל אופן שהוא פון א זאך וואס קוקט אויס ווי א הצלחה,

וואס לפי האמת ווער ס'קוקט אביסל טיפער זעהט ער אז זיי האבן שוין געהאט אזעלכע א.ג. נצחונות אמאל, און ס'איז גלייך אויפגעוואקסן נאכדעם נאך גרעסערע רוצחים און נאך גרעסערע פראבלעמען, אזוי איז אלעמאל געווען,

און אפי' זאכן וואס אויף די רגע קוקט עס אויס עס איז געלונגען, מיט חכמה, האט עס ליידער נאכדעם שפעטער געקאסט נאך מער קרבנות, דאס איז ליידער דער אמת, נאר מען ווערט פאר'כישופ'ט פון אביסל רגש און מען קוקט נישט מיט שכל,

אבער אונז תלמידים וחסידים, וואס מיר זענען אויפגעוואקסן אין דעם חדר, טארן נישט טראמפייטערן און ארומרעדן און זיך אוודאי נישט זיך פרייען מיט קיין שום מינדעסטע זאך וואס קוקט נאר אויס פון אויבנאויף ווי א הצלחה, עס דארף אונז וויי טוהן די גזירות וואס זיי ווילן גוזר זיין אויף די בחורים, אריינשלעפן מענטשן אין מיליטער, עס דארף אונז וויי טוהן אלע גזירות וואס דארט גייט פאר, און ווען אונז זאג מיר אין די ימי הרחמים והרצון "וכל הרשעה כולה כעשן תכלה כי תעביר ממשלת זדון מן הארץ" מעג מען אינזין האבן דאס, און מען דארף דאס אינזין האבן, און נאר דעמאלסט וועט קומען די גאולה שלימה און די מדינה וועט בטל ומבוטל ווערן בלי שום נזק פאר קיין שום איד נישט.

ומהאי טעמא, ווען ס'קומט די הייליגע טעג און אוודאי שבתים, מענטשן זיצן ביים טיש, ס'טוט זיך אין אמעריקע פאליטיק, ס'טוט זיך אין די וועלט פאליטיק, די ווייבער קענען אסאך מאל זיין אריינגעטוהן אין דעם ראשו ורובו, און זיי זענען אזוי איבערגענומען פון דעם, אפי' מער ווי די מענער אסאך מאל, ווייל א ווייב ארבעט דאך אויף רגש, פאליטיק ארבעט דאך אויך אויף רגש, נישט אויף שכל אסאך, און מען ווערט איבערגענומען, ממש ראשו ורובו, און ווען ס'קומט שבת ביים טיש ווערט עס א טעמע, און מען קייט איבער וואס דער גוי און וואס דער גוי האט געזאגט און געטוהן אדער געהאלטן,

א איד דארף צו וויסן, דאס האט מיט אונז נישט קיין שייכות, מיר וואוינען טאקע אין די מדינה אבער מיר זענען נישט קיין אמעריקאנער, נישט קיין רעפובליקאנער און נישט קיין דעמאקראטן, מיר זענען אידן נאמנים לה' ולתורתו, און מיר זענען מתפלל אז ווער עס זאל נאר נישט זיין דא דער ראש זאל זיין גוט פאר אידישע קינדער, צו ס'איז לאקאל צו ס'איז די גאנצע מדינה, נישט קיין נפקא מינה, דאס איז אונזער איינציגע בקשה, מיר האבן נישט קיין שייכות, און מיר ליגן נישט אין די זאכן.