מדינת ישראל פלאטע צייכנט אפ דריי יאר זינט די אקטאבער 7 אטאקעס ביי א ספעציעלע צערעמאניע אויף 'זיקים ביטש'

פונקטליך 6:29 אינדערפרי, די גענויע מינוט וואס די בלוטיגע אקטאבער 7 אטאקעס האבן זיך אנגעהויבן מיט דריי יאר צוריק, האבן זיך אנגעזעענע קאמאנדירן און זעלנער פון די מדינת ישראל פלאטע (נעיווי) פארזאמלט ביי 'זיקים ביטש' אפצוצייכענען דעם טאג מיט א ספעציעלע אנדענק-צערעמאניע.

די מאטראסן האבן אראפגעלאזט אן אנקער אין ים אריין, אלס א צייכן פון עהרע פאר די געפאלענע זעלנער וואס האבן באשיצט דעם בארטן דורכאויס די אטאקעס אין 2023. די צערעמאניע איז אנגעפירט געווארן דורך דעם נעיווי קאמאנדיר, ווייס-אדמיראל איל הראל, אינאיינעם מיט הויכראנגיקע אפיצירן וועלכע זענען געשטאנען זייט-ביי-זייט מיט די זעלנער בעת דער אנקער איז אראפגעלאזט געווארן אונטער די כוואליעס.

דער 'זיקים ביטש' טראגט א באזונדערע באדייט פאר די נעיווי. דארט איז געווען דער ארט וואו אינעם ביטערן אינדערפרי פון אקטאבער דעם 7'טן 2023, האבן די פלאטע קרעפטן אויפגעכאפט אן אינפילטראציע דורכ'ן ים, און האבן זיך פארמישט אין א פייער אויסטויש מיט כאמאס טעראריסטן אויף שיפלעך און טויכער וואס האבן פרובירט ארויסצוקומען אויפן טרוקעניש. די זעלנער האבן דעמאלט געהאלפן פארמיידן א פיל גרעסערע אינפילטראציע, טראץ וואס טייל טעראריסטן האבן זיך דורכגעכאפט און דורכגעפירט א טויטליכע אטאקע אויפן ביטש און אינעם דערנעבנדיגן קיבוץ.

די וואכעדיגע צערעמאניע איז א טייל פון א ברייטערע רייע אנדענק-פארזאמלונגען וואס קומען פאר איבער גאנץ מדינת ישראל אפצוצייכענען דריי יאר זינט די שוידערליכע אטאקעס. מיליטערישע צערעמאניעס און א מינוט פון שטילקייט זענען אפגעהאלטן געווארן אויף מיליטערישע באזעס איבערן גאנצן לאנד פונקטליך 6:29 אינדערפרי. פאר די נעיווי ספעציפיש, דינט דער אנקער וואס איז אראפגעלאזט געווארן אין ים אלס א בלייבנדער סימבאל, אפצוגעבן עהרע פאר די זעלנער און קעמפער וואס האבן אוועקגעגעבן זייער לעבן אין די וואסערן און אויפן זאמד ביי זיקים.