*אנגעצויגנקייט אין צפון ארץ ישראל גרייכט צו העכסטע שטאפל פון זיך אנטוויקלען אין פולשטענדיגע קריג*

ארץ ישראל - א אנגעצויגענע שבת איז אריבער אויף די איינוואינער אין צפון ארץ ישראל נאך די אטענטאט פרייטאג נאכמיטאג דורך מדינת ישראל אין די דאכיא געגנט אין ביירוט ווען 4 ׳בונקער באסטער׳ באמבעס האבן געצילט א קאמענד צענטער פון כיזבאללא צוויי שטאק אונטער די ערד, די אטאקע האט געצילט דער נומער 3 אין כיזבאללא איבראהים אקיל וואס איז עלימינירט געווארן אינאיינעם מיט נאך 11 הויכראנגיקע קאמאנדירן פון די ראדואן קרעפטן, איבערלאזנדיג די עליטע איינהייט פון די טעראר גרופע אהן קיין פירערשאפט.

אקיל איז געווען א טייל פון די פירערשאפט פון כיזבאללא פאר די לעצטע צענדליגע יארן און האט שוין איבערגעלעבט א אטענטאט פארזוך אין יאר 2000, זיינע הענט זענען געווען פארשמירט מיט אידיש בלוט פון אומצאליגע טעראר אטאקעס וואס ער איז געשטאנען דערונטער, ער האט געהאט א באלוין פון 7 מיליאן דאלאר  אויף זיין קאפ דורך די אמעריקאנער רעגירונג פאר זיין ראלע אין צוויי טעראר אטאקעס אין 1983 און 1984 אויף די אמעריקאנער אמבאסאדע און א מיליטערישע באזע אין לבנון וואס האט איבערגעלאזט הונדערטער אמעריקאנער טויטע.

די קאמאנדירן פון די ראדואן קרעפטן האבן לויט באריכטן געוועבט ערנסטע פלענער צו איבערשפילן די אקטאבאר זיבן אטאקעס אויף א שטערקערע און מער אכזריות׳דיגע פארנעם אויף די גליל ראיאן אין מדינת ישראל.

שבת האט כיזבאללא געשאסן איבער 100 ראקעטן אויף די שטעטלעך ביים גרעניץ, אין רעזולטאט האט די מדינת ישראל מיליטער דורכגעפירט העפטיגע באמבאדירונגען אויף מיסיל ארויסשיס סיסטעמס וואס זענען געווען גרייט צו שיסן אויף צפון ארץ ישראל און אויף א צאל וואפן זאפאסן.

שפעט ביינאכט מוצאי שבת האט כיזבאללא ווידער געשאסן א באראזש פון  פילע ראקעטן טיף אריין קיין מדינת ישראל צילנדיג די לופט באזע אין רמת דוד, די כיזבאללא ראקעטן שיסערייען האבן פאראורזאכט שאדנס און איין מאן איז לייכט פארוואונדעט געווארן.

שולעס אין די שטעט פון חיפה און ארויפציר האבן געמאלדן אז צוליב די אנגעצויגענע צושטאנד וועלן זיי זיין מארגן זונטאג גענצליך פארשפארט,,

קרעדיט: זעמל