שוידערליכע ווידיאו: מאסיווע פארפלייצונג אין נעפאל רייסט איין א בריק און שווענקט אפ צענדליגע הייזער

א שרעקעדיגע ווידיאו וואס איז פארשפרייט געווארן פון די גארקא דיסטריקט אין נעפאל, צייגט די מאסיווע קראפט פון א פלוצלינגדיגע פארפלייצונג (פלעש פלאד), ווי די בלאטעדיגע וואסערן פונעם 'בודי גאנדאקי' טייך קראכן אריין מיט א געוואלדיגע קראפט אין א מעטאלענע בריק נעבן ארוגאט, און עסט אפ די יסודות ביז די גאנצע סטרוקטור פאלט איין אינעם ברויזנדן טייך.

די בריק ווערט אידענטיפיצירט אין די באריכטן אלס די 'סאטי קאלא' בריק. א פריערדיגע קליפ צייגט ווי ריזיגע שטיינער און בלאטע פליסן אדורך נעבן הייזער און געגנטער, איבערלאזנדיג א חורבן. די בילדער כאפן אויף די ברוטאלע קראפט פון די פארפלייצונג וואס האט איבערגעלאזט אפילו מעכטיגע אינפראסטרוקטור אן קיין שום שאנס צו איבערלעבן.

די שווערע פארפלייצונגען האבן פאסירט אום אקטאבער 11, נאכדעם וואס א מאסיווע ערד-גליטש (לענדסלייד) האט צייטווייליג פארשטאפט דעם טייך, און דערנאך האט דאס וואסער זיך ארויסגעבראכן מיט אן אומגעהויערע קראפט. לאקאלע באאמטע געבן איבער אז די וואסערן האבן אפגעשווענקט צווישן 35 און 40 הייזער און אמווייניגסטנס זעקס בריקן. ווי אויך זענען היידרא-פאוער סטאנציעס געשעדיגט געווארן, עטליכע מענטשן פעלן, און מען האט געמוזט עוואקואירן אסאך איינוואוינער וואס וואוינען אראפציר פונעם טייך.

די ראיאן איז שוין געווען אין אן אלארמירנדע צושטאנד נאך א פריערדיגע פארפלייצונג אין סעפטעמבער ביים 'טעראנג' טייכל, וואס האט חרוב געמאכט הייזער און א בריק אויף די מאנאסלו ראוט, און געפירט צו א ווארענונג לענגאויס דעם בודי גאנדאקי טייך.

יעצט, בשעת זוך און רעטונג אפעראציעס זענען נאך אין פולן שוואונג, ברענגט די צוזאמפאל פון די וויכטיגע בריקן פרישע זארג פאר די אפגעזונדערטע קאמיוניטיס אין די בערג, וועלכע זענען אנגעוויזן אויף די געציילטע בריקן זיך צו קענען פארבינדן מיט די איבריגע טיילן פונעם לאנד.