היסטארישע קאמפיין: 20,000 סעמינאר מיידלעך אין ארץ ישראל שפאנען איין פאר 'קרן עולם התורה'

א מאסיווע פאנדרעיזינג קאמפיין לטובת דעם עולם התורה ברענגט צוזאמען ארום 20,000 סעמינאר תלמידות איבער גאנץ ארץ ישראל, אין א צייט וואס די 'קרן עולם התורה' גרייט זיך צו לאנצירן א ריזיגע אקציע צו שטיצן די ישיבות און כוללים.

אלס טייל פון די הכנות צום קאמפיין זענען פארגעקומען גרויסע אסיפות פאר די סעמינאר תלמידות אין בני ברק און אין ירושלים. בילדער און ווידעאוס וואס זענען פארשפרייט געווארן מאנטאג צייגן די מאסן אנטיילנעמער ביי די ספעציעלע פראגראמען לקראת דעם גרויסן פאנדרעיזינג קאמפיין.

אין ירושלים איז פארגעקומען א ריזיגע כינוס אינעם בויאנער בית המדרש אויף רחוב מלכי ישראל. אין די זעלבע צייט איז אפגעראכטן געווארן אן ענליכע קאנפערענץ אין די 'כתר הרימון' זאלן אין בני ברק, וואו די תלמידות האבן זיך צוגעגרייט צום גרויסן פראיעקט.

עס ווערט ערווארטעט אז ארום 20,000 סעמינאר מיידלעך וועלן נעמען אן אקטיווע ראלע אינעם ברייטן איניציאטיוו. טויזנטער קלאסרומס אין סעמינארן איבער גאנץ ארץ ישראל וועלן פארוואנדלט ווערן אין צענטראלע קאל-סענטערס, וואו די תלמידות וועלן קלינגען צו זייערע פאמיליע מיטגלידער, קרובים און באקאנטע, צו שאפן שטיצע פאר די לומדי תורה.

דער קאמפיין ווערט אנגעפירט אונטער די פאן פון 'קרן עולם התורה', וועלכע האט שוין אנגעפירט עטליכע מאסיווע פאנדרעיזינג אקציעס לטובת די ישיבות און כוללים. די יעצטיגע פראיעקט ברענגט דעם קאמפיין דירעקט אריין אין די סעמינאר וועלט, וואו טויזנטער תלמידות פאראייניגן זיך אין א קאארדינירטע אקציע צו העלפן אויפהאלטן די מוסדות התורה איבער גאנץ ארץ ישראל.