ווי עס ווערט יעצט געמאלדן, וועט דער רבי, וועלכער וויילט שוין די לעצטע תקופה אינעם הייליגן לאנד און וועט זיך דארט אויפהאלטן ביז קומענדיגן דינסטאג, זאגן די 'ערשטע סליחות' היינט פארטאגס אינעם גרויסן ביאלא בית מדרש אין ירושלים.

די עסקנים פונעם חצר האבן אין די לעצטע שעה'ן געארבעט אויסצושטעלן דעם ביאלא בית מדרש עס זאל קענען אקאמאדירן דעם ריזיגן ציבור חסידים און מעריצים וואס ווערן ערווארטעט צו קומען זיך מיטכאפן אינעם עת רצון און איינרייסן פאר א גוט געבענטשט יאר.

דער רבי שליט"א וועט ווייטער פארזעצן זיין באזוך אין ארץ ישראל און אויפנעמען קהל חסידים לעצה ולברכה אין די טעג בעפאר ראש השנה, און וועט זיך דעם קומענדיגן דינסטאג אומקערן למעון קדשו אין ניו יארק צו אפרעכטן די ימים נוראים.