באוואפנטע פארדעכטיגטע אנטלאפן קיין א-ראם נאך א דראמאטישע טשעיס אויף ראוט 60; אפיציר און סאלדאט פארוואונדעט
גאלערי
ווידעאס
בס"ד
ברייטע זוכענישן אין בנימין ראיאן נאך דראמאטישע פאליציי יאגד אויף צוויי באוואפנטע פארדעכטיגטע
מדינת ישראל זיכערהייט קרעפטן האבן אונטערגענומען א ברייטע זוכעניש אקציע נאכדעם וואס צוויי באוואפנטע פארדעכטיגטע זענען אנטלאפן פון פאליציי נעבן דעם אדם אינטערסעקשאן אינעם בנימין ראיאן. די פארברעכער האבן געפירט די פאליציי און סאלדאטן אויף א ווילדע יאגד אויף רוט 60, בעפאר זיי האבן באוויזן צו אנטלויפן קיין אל-ראם.
דער אינצידענט האט זיך אנגעהויבן מאנטאג אינדערפרי, ווען א פאליציי אפיציר און א סאלדאט וואס האבן פאטראלירט אין די געגנט האבן באמערקט א קאר אפגעשטעלט ביי די זייט פונעם וועג נעבן דעם אדם אינטערסעקשאן. נעבן דעם קאר זענען געשטאנען צוויי מענטשן וועלכע האבן אויסגעזען צו זיין באוואפנט.
ווי נאר די צוויי האבן באמערקט די זיכערהייט קרעפטן, האבן זיי זיך אריינגעזעצט אין זייער קאר און אנגעהויבן צו אנטלויפן, וואס האט געפירט צו א ווילדע יאגד אויף רוט 60. די פאליציי זאגט אז די פארדעכטיגטע זענען געפארן גאר געפערליך דורכאויס די יאגד און האבן אריינגעקראכט אין א פאליציי קאר, פאראורזאכנדיג אן עקסידענט אין וועלכן דער אפיציר און דער סאלדאט זענען לייכט פארוואונדעט געווארן. ביידע זענען אפגעפירט געווארן אין שפיטאל פאר באהאנדלונג.
די נאכיאגנדע קרעפטן האבן געעפנט פייער אויף די רעדער פונעם קאר אין א פרואוו עס אפצושטעלן, אבער די פארדעכטיגטע האבן ווייטער פארגעזעצט צו פארן אין ריכטונג פונעם פאלעסטינער שטעטל אל-ראם און זענען אנטלאפן אינעם געגנט.
פאליציי און צה"ל קרעפטן האבן באלד דערויף אונטערגענומען א ברייטע זוכעניש, בשעת קרעפטן פון די בנימין בריגאדע האבן ארומגערינגלט אל-ראם און אפערירט אין 'עריע בי' אין א פרואוו צו טרעפן די אנטלאפענע.
דער פאליציי קאמאנדיר פון די יהודה ושומרון דיסטריקט, משה פינטשי, האט געזאגט אז די וואכזאמקייט און שנעלע רעאקציע פון די קרעפטן האט מעגליך פארמיטן א פיל ערנסטערע אינצידענט. די אטאריטעטן האבן דערווייל נאכנישט פעסטגעשטעלט וואס די באוואפנטע פארדעכטיגטע האבן געפלאנט, און די אויספארשער זאגן אז אלע מעגליכקייטן ווערן גענומען אין באטראכט.
די אויספארשונג איז איבערגעגעבן געווארן פאר די קרימינאלע אפטיילונג פונעם שומרון דיסטריקט בשעת די זוכענישן גייען ווייטער אן מיט א פולן שוואונג.