טבריה: טויזנטער בני תורה ביי גרויסארטיגע "ריתחא דאורייתא" מעמד בראשות ראש ישיבת סלאבאדקא

טויזנטער בני תורה און אינגעלייט פון טבריה און די ארומיגע געגנטער האבן זיך מיטוואך פארזאמלט צו א גרויסארטיגע "ריתחא דאורייתא" מעמד, אנגעפירט דורך דעם סלאבאדקא ראש ישיבה, הגאון רבי דוב לאנדא שליט"א.

דער געהויבענער מעמד איז פארגעקומען אין די "ארמוניה" זאלן אין טבריה, וואו דער ריזיגער ציבור האט זיך צוזאמגענומען צו הערן דברי חיזוק און פילפולה של תורה פונעם ראש ישיבה. די אסיפה האט זיך געשלאסן מיט פייערדיגע ריקודין, ווען דער גאנצער זאל האט זיך ארויסגעלאזט אין פרייליכע טענץ און געזאנג לכבודה של תורה.

דער ראש ישיבה איז אריגינעל געקומען צו די געגנט אין פארבינדונג מיט א ספעציעלע קאנפערענץ פאר די נגידים און שטיצער פון "קרן עולם התורה", וואס איז פארגעקומען אינעם "סטאי" האטעל נעבן דעם כנרת. די לאקאלע עסקנים האבן אויסגענוצט די געלעגנהייט פון זיין באזוך אין שטאט, און האבן ספעציעל ארגאניזירט דעם עקסטערן מעמד פאר די וואקסנדע תורה-קאמיוניטי אין טבריה.

אין זיינע דברי הדרכה ביים מעמד, האט דער ראש ישיבה ארויסגעברענגט מיט התפעלות די הערליכע וואוקס פונעם עולם התורה אין טבריה, אנווייזנדיג אז הונדערטער בני תורה פון פארשידענע קרייזן האבן זיך באזעצט אין די שטאט אין די לעצטע יארן. ער האט שטארק ארומגערעדט איבער די חשיבות פון לימוד התורה, און דערנאך אדרעסירט די שווערע מצב און די גזירות וואס פלאגן דעם עולם התורה אין ארץ ישראל.

"יעדער ווייסט אז דער עולם התורה געפינט זיך יעצט אין א גאר שווערע מצב," האט הגר"ד לאנדא געזאגט, צולייגנדיג אז די פרעשור פונעם רעגירונג אויף די מוסדות און ישיבות ווערט אלס גרעסער און ווערט שוין געשפירט דורך יעדן יחיד.

דער ראש ישיבה האט קלארגעשטעלט אז מען טאר זיך נישט פארלאזן אויף קיין שום פאליטישע פירער אדער רעגירונג, נאר אונזער איינציגסטע האפענונג איז צום רבונו של עולם. וויבאלד די ימי הדין דערנענטערן זיך, האט ער גערופן דעם ציבור צו פארמערן אין לימוד התורה און מעשים טובים, און איינרייסן רחמים פארן עולם התורה.

דער היסטארישער מעמד אין טבריה איז א טייל פון א רייע גרויסע "ריתחא דאורייתא" אסיפות וואס ווערן אפגעראכטן דורך דעם ראש ישיבה אין פארשידענע שטעט, מיטן ציל צו פארשטארקן דעם קשר צווישן דעם ראש ישיבה, תלמידי חכמים און דעם ברייטן ציבור בני תורה.

מערכת באמערקונג: די באריכטן איבער די ציוניסטישע פאליטיק, וואלן אדער געזעצגעבונגען ווערן געברענגט בלויז פאר אינפארמאטיווע און זשורנאליסטישע צוועקן. די דאזיגע דעקונג באדייט בשום אופן נישט קיין אנערקענונג אין די פרייע רעגירונג אדער אירע אינסטאנצן. אין איינקלאנג מיט די מסורה און השקפה פון די גדולי ישראל, איז יעדע אנטיילנאמע אין די ציוניסטישע כנסת, רעגירונג קאאליציעס אדער שטאטישע פירערשאפט שטרענג פארבאטן. מיר בלייבן געטריי צו די ריינע דעת תורה, אינגאנצן אפגעשיידט פון די פרייע פאליטישע סיסטעמען.