*באקאנטע פילאנטראפ ר׳ יואל לאנדא רופט פאר ק"ק גור צו אויפהערן נעמען רעגירונג שטיצע פון מדינת ישראל אין בריוו פארן מנהיג העדה כ"ק אדמו"ר מגור שליט"א*

ניו יארק - נעכטן זונטאג האט דער באקאנטע פילאנטראפ הנגיד ר׳ יואל לאנדא מחשובי חסידי סאטמאר אנגעקומען זיך געזעגענען פון כ"ק אדמו"ר מגור שליט"א אינעם פריוואטן פליגער בעפארן דער רבי האט זיך אומגעקערט קיין ארץ ישראל נאכן וויילן אין אמעריקע פאר 16 טעג נאכן אויפטרייבן מיליאנען דאלארן פאר די קרן הצלת עולם התורה - גור, ביים זיך געזעגענען האט ר׳ יואל איבערגעגעבן א בריוו פארן רבי׳ן וואס איר אינהאלט איז אצינד פארעפנטליכט געווארן, אינעם לענגערע בריוו וואס מיר וועלן נאר ארויסברענגען די תמצית הדברים דערפון ברענגט ר׳ יואל ארויס צום רבי׳ן אז ק"ק גור זאל אנהייבן נעמען אין באטראכט זיך צו אפשיידן פון די מדינת ישראל רעגירונג שטיצע און אנהייבן אליין צו אויסהאלטן די אייגענע מוסדות התורה.

אין די בריוו דעקט ר׳ יואל אויף אז ביי זיין באזוך ביים רבי'ן בעפאר שבועות אין ירושלים האט מען גערעדט איבער די גזירת גיוס בני הישיבות און דער רבי האט דערביי ערווענט אז מ׳טאר זיך נישט בשום פנים ואופן לאזן פון די  רעגירונג וואס וויל אריין צווינגען די חרדי'שע בחורים אין די ארטיגע מיליטער, ר׳ יואל ברענגט ארויס די שטארקייט פון ק”ק גור פארן זיין די גודר גדר ועומד בפרץ אינעם קאמף קעגן די גזירת הגיוס און זייער דעפוטאט אין כנסת דער האוזינג מיניסטאר יצחק גאלדקנאפף וואס האט זיך דעריבער אפגעזאגט פון די רעגירונג קאליציע.

פון דא גייט ר׳ יואל אריבער צו א פארשלאג אז ק"ק גור זאל יעצט נעמען די ריכטיגע אויסוואל און זיך גענצליך אפשיידן פון די רעגירונג שטיצע אין א בחינה פון לא מדובשך ולא מעוקצך, ער ערווענט אז אין ק"ק סאטמאר האט הרה"ק מסאטמאר זי"ע גענצליך גע’אסר’ט צו נעמען שטיצע פון די מדינת ישראל רעגירונג און דאס האט אויפגעבויט א דור פון נגידים ותומכי תורה, וויבאלד מ׳ווייסט אז נאר די בעלי בתים קענען אויסהאלטן די מוסדות און דערפאר פארדינט מען מער און מ׳געבט דערפאר פיל מער פאר די מוסדות אהן חשבונות צו צוריקבאקומען עפעס דערפאר, דאקעגן אין די קהילות און חצרות הקודש וואס נעמען יא געלט אינוועסטירן די בעלי בתים זייער איבריגע געלטער אין פארשידענע אינוועסטירונגען און געבן דאס נישט סתם אזוי פאר די מוסדות התורה פון זייערע קינדער און ווען די רעגירונג האקט אפ די געלטער גייט מען איין אויף פשרות מיט די רעגירונג נאר צו צוריק זעהן די פאר דאלאר וואס דערפאר מיינט מען אז אהן דעם קען מען נישט ווייטער אנגיין.

ארטיקל קרעדיט - זעמל - נייעס וואס איר זענט נישט אין ערגעץ 

https://drive.google.com/file/d/1LpQvWSO3Gl7Nk50fT1EM3c-htWlMcuq1/view?usp=drivesdk