רוביא בארואיגט די אמעריקאנער: "מיר זענען נישט אונטער קיין סיסטעמאטישע אטאקע" טראץ די כוואליע פון טעכנאלאגישע אויספאלן
גאלערי
ווידעאס
סעקרעטערי אוו סטעיט מארקא רוביא בארואיגט דעם פובליק איבער די רייע טעכנאלאגישע און באנק איבעררייסן: "מיר זענען נישט אונטער קיין סייבער אטאקע"
סעקרעטערי אוו סטעיט מארקא רוביא איז ארויסגעטרעטן מיט א פובליק סטעיטמענט אין מאנילא, פיליפינען, אינמיטן פרעזידענט דאנאלד טראמפ'ס אזיע רייזע, צו אדרעסירן די וואקסנדע זארגן איבער א רייע טעכנאלאגישע און באנק איבעררייסן וואס זענען פארגעקומען איבער די פאראייניגטע שטאטן.
אויף די פראגע צי אמעריקאנער בירגער דארפן מורא האבן פון א 'ראן אויף די בענק', אין ליכט פון באריכטן אז מענטשן האבן אנגעהויבן איינצוקויפן און אָנצופילן סופלייס, האט רוביא קלארגעשטעלט אז די באזונדערע אינצידענטן זענען בכלל נישט פארבינדן איינס מיטן צווייטן און אז באאמטע האבן נישט געפונען קיין שום באווייזן פון א קאארדינירטע סייבער אטאקע.
"די געשעענישן האבן גארנישט איינס מיטן צווייטן. זיי זענען נישט פארבינדן. זיי זענען אלע באזונדער און עקסטער," האט ער געזאגט פאר רעפארטער. רוביא האט אנגעוויזן אז אלע צייכנס ווייזן אויף פשוט'ע טעכנישע פראבלעמען, און נישט אויף קיין אקציעס דורך העקערס, טעראריסטן אדער פרעמדע רעגירונגען. ער האט אנערקענט אז די כסדר'דיגע איבעררייסן האבן אנגעזייט א פחד און אומזיכערקייט ביי די אמעריקאנער באפעלקערונג, אבער ער האט טענה'ט אז זיין אפן און טראנספארענט איז דער בעסטער וועג צו בארואיגן דעם פובליק.
"מיר זענען נישט אונטער קיין סיסטעמאטישע אטאקע," האט רוביא דעקלערט, פרובירנדיג צו בארואיגן די געמיטער פון די וואס זארגן זיך איבער די זיכערהייט פון וויכטיגע סערוויסעס און פינאנציעלע אינסטיטוציעס.
די איבעררייסן האבן אפעקטירט עטליכע גרויסע סיסטעמען, אריינגערעכנט מייקראסאפט סערוויסעס, די פעדעראלע אוויאציע אדמיניסטראציע (FAA), טשעיס באנק און אנדערע באנק פלאטפארמעס, יונייטעד עירליינס אפעראציעס, ווי אויך אן אינערליכע קאמוניקאציע נעץ וואס ווערט גענוצט דורך די 'ען-עס-עי' (NSA). באאמטע האבן אנגעוויזן אז די אינצידענטן זענען געקומען צוליב באזונדערע טעכנישע פראבלעמען, אריינגערעכנט א נעטווארק אפגרעיד, ראוטער פראבלעמען, א סאפטווער באג, און פאראויס-געפלאנטע מעינטענענס.
דער דירעקטאר פון נעשאנעל אינטעלידזשענס, דזשעי קלעיטאן, האט אויך געמאלדן אז אינטעלידזשענס באאמטע זעען נישט קיין שום צייכנס פון א קאארדינירטע סייבער אטאקע אדער אן אקציע געשטיצט דורך א פרעמדע לאנד. כאטש די אדמיניסטראציע האלט זיך ביי דאס איריגע אז עס איז נישטא קיין שום באווייזן פון א פאראייניגטע פיינטליכע אפעראציע, האט די מאדנע טיימינג און די גרויסע צאל איבעררייסן געברענגט פראגעס פון געזעצגעבער, טעכנאלאגיע עקספערטן, און אפילו טייל פאליטישע אליאירטע, איבער די שטארקייט פון די אמעריקאנער אינפראסטרוקטור.
רוביא האט אונטערגעשטראכן אז די רעגירונג וועט ווייטער אויספארשן יעדע אינצידענט באזונדער, אנשטאט אנצונעמען אז זיי זענען פארבינדן. זיינע רייד זענען געקומען אין א צייט וואס די אדמיניסטראציע זוכט צו בארואיגן דעם פובליק'ס אנגסט און אפשלאגן שפעקולאציעס אז דאס לאנד שטייט אויס א קאארדינירטע אטאקע.