פרעזידענט טראמפ מעלדט א מיליאן דאלאר באלוינונג פאר אינפארמאציע איבער וויילער שווינדל

א וואך בעפאר די נאוועמבער 2026 מידטוירם עלעקשאנס, האט פרעזידענט טראמפ געמאלדן מאנטאג אויף זיין 'טרוט סאשעל' פלאטפארמע א ריזיגע באלוינונג פון א מיליאן דאלאר פאר ווער עס וועט איבערגעבן אינפארמאציע איבער וויילער שווינדל.

דער פרעזידענט האט קלארגעשטעלט אז די באלוינונג איז גילטיג סיי פאר פריערדיגע וואלן און סיי פאר די קומענדיגע מידטוירמס. אבער, א טיפ אליין איז נישט גענוג; דאס געלט וועט בלויז אויסגעצאלט ווערן נאכדעם וואס די שווינדלער ווערן ארעסטירט און קאנוויקטעד אין געריכט.

די מעלדונג קומט בלויז עטליכע טעג נאכדעם וואס טראמפ און ווייס פרעזידענט ווענס האבן ארויסגעשטעלט א באזונדערע 25 מיליאן דאלאר 'וויסלבלויער' פראגראם, וואס צילט צו באלוינען מענטשן וואס באריכטן שווינדלערייען אין גאווערנמענט פראגראמען.

די גרעסטע פראגע וואס פילע פרעגן יעצט איז, פון וואו דאס געלט וועט קומען, וויבאלד טראמפ האט נישט אנגעגעבן ווער עס גייט פאנדן אדער אנפירן די פראגראם. זיינע שטיצער קוקן דאס אן אלס א דרייסטע שריט צו באשיצן די ריינקייט פון די וואלן, בעת קריטיקירער זען דאס אלס נאך א פרואוו פונעם פרעזידענט צו האבן א גרעסערע איינפלוס אויף די קומענדיגע מידטוירמס.

ווי באקאנט, טענה'ט טראמפ שוין לאנג אז שווינדלערייען האבן אים געקאסט די 2020 עלעקשאנס, כאטש די געריכטן האבן ארויסגעווארפן די קלאגעס פון אים און זיינע אליאירטע, אפטמאל צוליב פראצעדוראלע סיבות. באריכטן צייגן אן אז עס איז דערווייל נישטא קיין באווייזן אויף ברייט-פארשפרייטע וויילער שווינדל, און כאטש די צאל קלאגעס און קאנוויקשאנס פאר אומלעגאלע שטימען זענען געשטיגן דורכאויס זיין טערמין, איז עס אבער נישט געווען אין גענוג גרויסע נומערן צו טוישן די רעזולטאטן פון אן עלעקשאן.

די געריכטן האבן אויך לעצטנס בלאקירט טייל פון זיינע פרואוון צו טוישן די סיסטעם פון 'מעיל-אין' שטימען און צו פאדערן א באווייז פון בירגערשאפט, ממילא בלייבט אומקלאר ווי אזוי די נייע באלוינונג פראגראם וועט ארבעטן אין פראקטיק.