א נייע באריכט ארויסגעגעבן דורכ'ן ניו יארק סיטי קאמפטראלער אפיס צייגט אן אלארמירנדע בילד איבער די שטאטישע אמבולאנס סיסטעם. לויט די דאטא, נעמט יעצט דורכשניטליך ארום 13 מינוט פאר אן אמבולאנס אנצוקומען צו א לעבנס-געפאר עמערדזשענסי. דאס איז א שפרונג פון 41 פראצענט אין פארגלייך צו א יארצענדליג צוריק, וואס קומט אויס צו א דראסטישע העכערונג פון 3 מינוט און 50 סעקונדעס.

ווען א מענטש ליידט חלילה פון א הארץ אטאקע אדער קען נישט אטעמען, קענען די עטליכע עקסטערע מינוטן זיין דער חילוק צווישן לעבן און טויט רח"ל. דער באריכט ווייזט אן אז די הויפט אורזאכן פאר די פארשפעטיגונגען זענען א 23 פראצענט העכערונג אין קריטישע רופן, א מאנגל אין סטעף, און די שווערע טראפיק אויף די שטאטישע גאסן. די פייער דעפארטמענט (FDNY) האט רעאגירט אז זיי זוכן וועגן וויאזוי צוריקצודרייען דעם טרענד.

אין ליכט פון דעם קריזיס, שטופט די סיטי קאונסיל פרוי דזשאען אריאלא א נייע געזעץ וואס זי רופט די "מינוטן מאכן אויס" (Minutes Matter) ביל, צו ברענגען מער דורכזיכטיגקייט צום פראבלעם. די ביל וועט פארלאנגען פון די שטאטישע 'עמערדזשענסי מענעדזשמענט' אגענטור ארויסצושיקן א פובליק מעלדונג יעדעס מאל וואס מער ווי 25 אמבולאנס רופן ווארטן צו ווערן דיספעטשד. דאס וועט געבן צו וויסן פאר איינוואוינער איבער די דילעיס און וועלכע אנדערע אפציעס עס זענען דא פאר נישט-עמערדזשענסי פעלער.

ביי א סיטי קאונסיל פארהער וואס איז פארגעקומען דעם 20'סטן אקטאבער איבער פייער און עמערדזשענסי מענעדזשמענט, האבן פארשטייער פון די EMS יוניאן און שטאטישע באאמטע אויפגעטרויטן און עדות געזאגט איבער דעם קריזיס. זיי האבן אנגעוויזן אויף די גרויסע 'טוירנאווער' ביי די EMT ארבעטער, וויבאלד אסאך פון זיי פארלאזן דעם דזשאב כדי צו ווערן פייערלעשער וואס צאלט בעסער.

די ביל ווערט נאך יעצט באטראכט אין קאונסיל, אבער ניו יארקער בירגער פרעגן זיך צו בלויז ארויסשיקן אלערטס קען טאקע פאררעכטן א סיסטעם וואס האלט ביים אויסלויפן פון אמבולאנסן און ארבעטער.