פרעזידענט טראמפ מאכט אוועק רעדעס איבער א דריטע אימפיטשמענט: "זיי קענען מיך נאר אימפיטשן פארן מאכן אמעריקע שטארק"

וואשינגטאן – פרעזידענט דאנאלד טראמפ האט אוועקגעמאכט די פרישע רעדעס און שמועות איבער א מעגליכע דריטע "אימפיטשמענט", זאגנדיג אז די איינציגסטע זאך פאר וואס די דעמאקראטן קענען אים אימפיטשן איז "פארן מאכן אונזער לאנד באמת שטארק".

אין אן אינטערוויו מיטן ניוזמעקס רעפארטער ראב פינערטי דעם 15'טן אקטאבער אינעם ווייסן הויז, איז דער פרעזידענט געפרעגט געווארן איבער די דעמאקראטן וועלכע זענען זייער הויך מיט זייערע פלענער אים נאכאמאל צו פרובירן ארויסצוווארפן פון אמט. טראמפ האט דערויף רעאגירט אז דער איינציגסטער פארברעכן וואס ער זעהט איז דאס וואס ער מאכט דאס לאנד שטארק און רייך.

צו שטיצן זיינע ווערטער, האט טראמפ אנגעוויזן אויף זיינע ציפערן אז אמעריקע וועט זען אן אינוועסטמענט פון 22 טריליאן דאלאר אין א צייט אפשניט פון 15 מאנאטן. דאס איז אין קאנטראסט צו די 3 טריליאן דאלאר וואס טשיינע האט באוויזן א יארצענדליג צוריק, און קוים א האלבן טריליאן דאלאר אונטער די ביידען אדמיניסטראציע.

דער פרעזידענט האט אויך דערמאנט אז ער איז שוין געווארן אימפיטשד צוויי מאל אין דער פארגאנגענהייט, און ביידע מאל האט ער גרינג געוואונען און איז ריינגעוואשן געווארן. ער האט צוגעגעבן אז טייל מענטשן האלטן אפילו אז עס האט אים נאר געהאלפן פאליטיש, און אז ער איז שוין געווארן גאר גוט אין וואס ער רופט אן "אנטי-אימפיטשמענט".

טראמפ האט ווייטער פארציילט אז א דעמאקראטישער קאנגרעסמאן האט לעצטנס געזאגט אויף טעלעוויזיע אז די פארטיי וויל אים אימפיטשן, אבער האט נישט געקענט קלאר ארויסברענגען פונקטליך פאר וואס. דער אינטערוויוער פינערטי האט דערויף צוגעגעבן אז די דעמאקראטן וועלן פשוט טרעפן א תירוץ שפעטער, אויב זיי וועלן איבערנעמען די מאכט אינעם קאנגרעס.

ווי באקאנט איז טראמפ געווארן אימפיטשד דורך די קאנגרעס אין דעצעמבער 2019 און נאכאמאל אין יאנואר 2021, און ביידע מאל איז ער פרייגעשפראכן געווארן דורכן סענאט. די אימפיטשמענט פרואוון זענען אבער צוריק ארויפגעשווימען אין זיין צווייטן טערמין, אריינגערעכנט פרישע ארטיקלען וואס זענען פארגעשלאגן געווארן דורך קאנגרעסמאן שרי טהאנעדאר אין מאי 2025, וועלכע באשולדיגן אים אין שטערן יוסטיץ, כאבאר און קארופציע. די קאנגרעס האט אויך אפגעשטימט אפצולייגן כאטש איין אימפיטשמענט רעזאלוציע, וואס צייגט ווי צעטיילט די קאנגרעס איז איבער דעם אישו.

מיט די בעפארשטייענדע נאוועמבער 3 "מיטטורם" וואלן וואס קומט נענטער, וואו די קאנטראל פונעם קאנגרעס ליגט אויפן טיש, ווערט די פראגע צי די דעמאקראטן וועלן טאקע גיין פאראויס מיט א דריטע אימפיטשמענט א הויפט טעמע אין די קאמפיין. די דעמאקראטן פון זייער זייט טענה'ן אז די סיבות אים אויסצופארשן אדער אימפיטשן גייען פיל ווייטער ווי בלויז זיינע עקאנאמישע אויפטוען.