היסטארישע שריט: מדינת ישראל און מאראקא וועלן עפענען פולע אמבאסאדעס און פארברייטערן דיפלאמאטישע באציאונגען

מדינת ישראל און מאראקא האבן זיך געאייניגט צו נעמען זייערע דיפלאמאטישע באציאונגען צום קומענדיגן שטאפל, און וועלן אפיציעל טוישן זייערע פארבינדונגס-אפיסעס צו פולשטענדיגע אמבאסאדעס, ווי אויך וועלן זיי צום ערשטן מאל אפיציעל שטעלן אמבאסאדארן איינע ביי די אנדערע.

דער דורכברוך איז געקומען נאך א געמיינזאמע זיצונג אין ניו יארק צווישן דעם מדינת ישראל אויסערן מיניסטער גדעון סער און דער מאראקאנער אויסערן מיניסטער נאסער בוריטא, וואס איז געהאסט געווארן דורך דעם אמעריקאנער אמבאסאדאר צו די יו-ען, מאיק וואלץ.

סער האט אנגערופן די פריינטשאפט צווישן דעם מאראקאנער און אידישן פאלק "טיף-איינגעווארצלט און היסטאריש", זאגנדיג אז די נייע דעקלאראציע וואס איז אונטערגעשריבן געווארן שטעלט ארויס פראקטישע שריט וואס ביידע זייטן פלאנירן איצט דורכצופירן.

אויסער דעם וואס מען גייט עפענען פולע אמבאסאדעס, האבן די צוויי לענדער זיך אויך געאייניגט צו פארברייטערן דירעקטע פליגערס, אפרעכטן הויכראנגיקע באזוכן אין די קומענדיגע מאנאטן, און ענדיגן די פארהאנדלונגען איבער אינוועסטמענט שוץ און 'דאבל-טעקסעישאן' אפמאכן ביז ענדע יאר 2026.

די מעלדונג קומט בלויז איין טאג נאכדעם וואס אמבאסאדאר וואלץ האט אפגעצייכנט דעם זעקסטן יארטאג פון די 'אברהם אקארדס' ביי אן עווענט אין ניו יארק, וואו עס האבן זיך אויך באטייליגט פארשטייער פון די פאראייניגטע אראבישע עמיראטן, באכריין, מאראקא און קאזאכסטאן.

מאראקא האט צום ערשט באנייט אירע באציאונגען מיט מדינת ישראל צוריק אין דעצעמבער 2020 אונטער די אברהם אקארדס, אבער די באציאונגען זענען ביז איצט געבליבן לימיטירט צו נידעריגערע שטאפלען. דאס מאכט דעם יעצטיגן שריט אלס דער מערסט באדייטנדער פארשריט אין די באציאונגען אין די לעצטע יארן.

דער שריט צייגט אויף די ווייטערדיגע אמעריקאנער אינוועסטמענט צו פארברייטערן און פארטיפן די נארמאליזאציע פון די אברהם אקארדס. אויב די פלענער וועלן פולשטענדיג דורכגעפירט ווערן, ערווארט מען אז עס וועט שטארק הייבן די האנדל, טוריזם און רייזעס צווישן די צוויי לענדער פיל מער ווי עס האלט היינט צוטאגס.