ספעקטאקולערע 'וואסער-טארנעידאו' אפגעכאפט אויפן מיטלענדישן ים נעבן איטאליע

אן אויסטערלישע נאטור-ערשיינונג איז אפגעכאפט געווארן דעם פארגאנגענעם סעפטעמבער 10, ווען א ריזיגע 'וואסער-טארנעידאו' (וואטער-ספאוט) האט זיך פארמירט איבערן מיטלענדישן ים, נעבן די באקאנטע קאוסטל שטאט סאנטא מארגעריטא ליגורע אין איטאליע.

א ווידעא וואס איז געכאפט געווארן פון א שיפל צייגט די דראמאטישע סצענע ווי א מאסיווע זייל ציט זיך אראפ פון די שטורמישע וואלקענעס גלייך אריין אינעם ים, צייגנדיג די געוואלדיגע קראפט פון נאטור. די שוידערליכע אבער הערליכע סצענע איז געקומען אין א צייט וואס דער ראיאן אין איטאליע, נישט ווייט פון פארטאפינא, ליידט פון אומסטאבילע וועטערס.

לאקאלע וועטער עקספערטן האבן שוין פון פריער ארויסגעגעבן שטרענגע ווארענונגען איבער שווערע טאנדער-סטארמס, מאסיווע רעגנס און מעכטיגע ווינטן וואס זענען ערווארטעט צו באטרעפן דעם געגנט. די סארט וואסער-טארנעידאוס קענען זיין גאר געפארפול, ספעציעל פאר קליינע שיפלעך וואס געפינען זיך אין די געגנט. כאטש זיי האלטן זיך געווענליך נישט צו לאנג, ברענגען זיי אבער מיט זיך גאר שטארקע ווינטן וואס קענען איבערדרייען שיפן אין א רגע, און מאכן דעם רואיגן ים פארוואנדלט ווערן אין א שטורמישע סכנה.

צוליב די שווערע וועטער אומשטענדן, האבן די לאקאלע אויטאריטעטן אין שטאט ארויפגעלייגט א צייטווייליגע פארבאט אויף שווימען ביים ארטיגן 'גיאיא ביטש', אויס מורא פאר די זיכערהייט פון די באזוכער און צוליב די שוואכע קוואליטעט פונעם וואסער נאך די שווערע רעגנס.

פאר די איינוואוינער און טוריסטן וואס האבן מיטגעהאלטן דעם ספעקטאקל, איז עס געווען אן אטעם-פארכאפנדע בילד, אבער אויך א קלארע דערמאנונג איבער די סכנות פון די ים-שטורעמס. די אויטאריטעטן בעטן פונעם פובליק צו זיין גאר פארזיכטיג, זיך האלטן אין א זיכערע ווייטקייט פון די וואסערן בעת עס רוישט א שטורעם, און כסדר מיטצוהאלטן די וועטער באריכטן.