דראמאטישע טעראר פרואוו אין די לופטן: פאסאזשירן ראטעווען פליגער קיין ארץ ישראל נאכדעם וואס קא-פילאט שטעכט דעם הויפט פילאט און פרובירט צו קראכן דעם פליגער

מדינת ישראל פרעמיער מיניסטער בנימין נתניהו האט זיך געוואנדן צום פאלק נאך א גאר ערנסטע זיכערהייט אינצידענט וואס האט זיך אפגעשפילט אויף א פליגער אויפן וועג קיין ארץ ישראל, וואס איז געווען אנגעפילט כמעט אינגאנצן מיט מדינת ישראל פאסאזשירן.

דער שוידערליכער אינצידענט האט פאסירט אויף א 'פליי-דובאי' פליגער (פלאיט FZ1073) וואס איז געווען אויפן וועג פון דובאי קיין תל אביב. אינמיטן די רייזע האט דער קא-פילאט געשטאכן דעם הויפט פילאט און געפירט דערצו אז דער פליגער זאל פלוצלינג אנהייבן פאלן מיט א שנעלקייט, אין א קלארע פרואוו צו קראכן דעם פליגער מיט אלע פאסאזשירן דערין.

נתניהו האט איבערגעגעבן אז ער האט גערעדט דירעקט מיט איינע פון די פאסאזשירן וואס האבן געהאלפן איינברעכן אינעם קאקפיט בשעת דער פליגער האט געהאלטן אינמיטן פאלן. די העלדישע פאסאזשירן האבן באוויזן צו נייטראליזירן דעם שטעכער בשעת ער האט נאך פרובירט צו סאבאטאזשירן די סיסטעמען פונעם פליגער און צוריק איבערגענומען קאנטראל. דער פרעמיער מיניסטער האט אויסגעלויבט די אידן אלס העלדן וועלכע האבן ארויסגעוויזן אויסערגעווענליכע קוראזש און העלדישקייט, און דערמיט געראטעוועט פילע לעבנס און פארמיטן א שרעקליכע קאטאסטראפע.

אלע פאסאזשירן זענען יעצט אינדרויסן פון געפאר נאכדעם וואס דער פליגער האט געמאכט א סוקסעספולע עמערדזשענסי לאנדונג אין טאבוק, סאודי אראביע. דער אטאקירער ווערט יעצט אויסגעפרעגט דורך די סאודישע אויטאריטעטן.

נתניהו האט באשטעטיגט אז מדינת ישראל איז אין קאנטאקט מיט סאודישע באאמטע צו אראנזשירן אז די פאסאזשירן זאלן זיך קענען אומקערן אהיים בשלום. ער האט אויך פארארדנט די זיכערהייט אגענטורן זיך צו גרייטן פאר מעגליכע פרישע טעראר סטראשונגען אין ליכט פון דעם אינצידענט.

די זיכערהייט אגענטורן באהאנדלען דעם עפיזאד אלס א צילברעטליכע טעראר פרואוו געצילט קעגן דעם פליגער. זיי ארבעטן יעצט אינאיינעם אויסצופארשן דעם פאל ביז די לעצטע דעטאלן, בשעת זיי מאכן זיכער אז אלע פאסאזשירן זענען באשיצט און קענען אהיימפארן אומגעשעדיגט.