א הערליכער מעמד חנוכת הבית וקביעת מזוזות איז פארגעקומען דעם פארגאנגענעם ערב שבת, פאר די נייע פראכטפולע הויפטקוואטיר פון "מפואר" דזשודעיקא  אין וויליאמסבורג ווען כ"ק אדמו"ר מסאטמאר שליט"א איז אנגעקומען אויף מעמד קביעת מזוזה אין די נייע פראכטפולע מפואר לאקאל.

די נייע וויליאמסבורג לאקאל אויף וואלאבאוט קארנער מארסי און יוניאן, איז אין די יעצטיגע טעג פולקאם פערענדיגט געווארן מיט איר פולן פראכט אין גלאנץ, אין איז אצינד געעפנט געווארן פארן ברייטן ציבור, וואו אידישע קינדער וועלן ווייטער קומען איינהאנדלען די הערליכע תשמישי קדושה, צוצוגיין צו די קיום המצוות מיט א תוכנ'פולע טעם און זיסקייט.

פרייטאג אינדערפרי איז כ"ק אדמו"ר מסאטמאר שליט"א אנגעקומען אויף א באזוך אין די נייע געשעפט, אין באגלייטונג פון בניו הרבנים הגאוה"צ שליט"א, הגה"צ אב"ד סיגוט שליט"א, הגה"צ ר' אהרן שליט"א, און הגה"צ ר' ליפא שליט"א. דער רבי שליט"א האט געקלאפט א מזוזה ביים הויפט אריינגאנג צום געשעפט, און דערנאך מכבד געווען בנו חביבו הגה"צ אבד"ק סיגוט שליט"א צו קלאפן א מזוזה. אויך האט זיך אנגעזעהן ביים מעמד דער בארימטער עסקן לכל קדשי בית ישראל הרב זעליג מענדלאוויטש שליט"א.

א לענגערע צייט האט דער רבי ארומשפאצירט אין די גאנצע געשעפט, און באטראכט די פילצאליגע חידושים און תשמישי קדושה, וואס זענען ערצייגט געווארן צו מקיים זיין דעם "זה קלי ואנוהו", דער רבי האט גאר שטארק באוואונדערט און אויסגעדרוקט התפעלות זעענדיג אז אידישע קינדער לאזן זיך קאסטן גרויסע געלטער צו פארבעסערן און פארשענערן די מצוות פונעם אויבערשטן, און כסדר קומט מען אויף מיט פרישע חידושים אין דעם "זה קלי ואנוהו", אויף א פארנעם ווי קיינמאל בעפאר.

גאר שטארק האט דער רבי אויסגעדרוקט זיין התפעלות, באטראכטענדיג די פארשידענע סארט "ציצית", וואס איז אהערגעשטעלט געווארן דורך "מפואר", אויסגערעכנט דורך ארום "פערציג" סארט שיטות, וויאזוי א ציצית דארף געמאכט ווערן. דער רבי האט זיך אריינגעלאזט אין א תורה'דיגע שמועס איבער פארשידענע סארט שיטות איבער די מצוה פון ציצית, און אויסגעדרוקט זיין געוואלדיגע קורת רוח זעענדיג אז אידישע קינדער געבן זיך אוועק צו מקיים זיין די מצוות מיטן גרעסטן הידור וואס מעגליך.

צום שלוס פונעם באזוך האט דער אייגענטומער הר"ר יעקב דוד ראטה הי"ו געשאנקען פארן רבי'ן א זעלטענע מתנה, א גאנצע הויפן פון האנט געשטריקטע זיידענע גארטלעך, וואס דער רבי וועט פארטיילן פאר אלע אייניקלעך לקראת די ימים טובים הבעל"ט. דער רבי האט עס שטארק באוואונדערט און זיך הארציג באדאנקט פאר די מנחת ביכורים.

דאן האט דער זיך די רבי געזעצט צו א מסיבת לחיים אין געהייסן זינגען א ניגון שמחה, דער רבי האט גאר ווארעם אנגעוואונטשן די בעלי בתים, מ'זאל ווייטער זיין הצלחה אין די עבודת הקודש, מיט פיל סייעתא דשמיא אויף טריט און שריט.