בלוטיגע שלאכטן אין תימן: איבער 500 טויטע אין א מאסיווע אפענסיווע קעגן די חותי רעבעלן

די סאודי-געשטיצטע תימן'ער רעגירונג קראפטן האבן אונטערגענומען א פרישע און מאסיווע אפענסיווע קעגן די איראן-געשטיצטע חותי רעבעלן, וואס האט שוין געקאסט דאס לעבן פון איבער 500 מענטשן אין בלויז איין וואך צייט.

די רעגירונג קראפטן זאגן אז זיי מאכן ערנסטע פארשריט אין די מאריב פראווינץ, א סטראטעגישע און אויל-רייכע ראיאן מזרח פון די הויפטשטאט סאנא, וואס איז שוין יארן לאנג א צענטער פון שווערע שלאכטן. בילדער און ווידעאוס פון די פראנט ליניעס צייגן מיליטערישע טאנקען און טרופן זיך רוקן פאראויס אין די מדבר'דיגע און בערגיגע געגנטער. די מיליטער גיט איבער אז זיי האבן דורכגעפירט א ברייט-פארנעמיגע אפעראציע אין דרום מאריב און האבן באוויזן צוריקצוכאפן עטליכע פאזיציעס וואס זענען ביז יעצט געווען אונטער די קאנטראל פון די חותי מיליציעס.

ווי אויך גייען אן שווערע קאמפן אויף די פראנטן אין די טאיז פראווינץ, נעבן טואיל און אל-בארא, וואו די רעגירונג טרופן זאגן אז זיי האבן אנגעמאכט שווערע פארלוסטן פאר די חותי קעמפער. דאס איז די מערסט אקטיווע פאזע פון ערד-קאמפן אין תימן אין די לעצטע יארן, נאך א לענגערע צייט פון א שוואכע פייער-אפשטעל.

ווי אזוי עס האט זיך אנגעהויבן

די פרישע כוואליע פון קאמפן האט זיך אנגעהויבן אנהייב סעפטעמבער ווען די חותיס האבן אונטערגענומען אן אפענסיווע אין טאיז, וואס האט געפירט דערצו אז די אינטערנאציאנאל-אנערקענטע רעגירונג זאל ענטפערן מיט א קאנטער-אפענסיווע אין די אל-דזשאוף און אל-באידא פראווינצן. אין בלויז עטליכע טעג האט זיך די געוואלדטאטן פארשפרייט קיין מאריב, אל-דאליע און אנדערע ראיאנען, ווען ביידע זייטן פאמפן אריין פרישע כוחות און רעסורסן אינעם קאמף.

לאקאלע נייעס קוועלער באריכטן אז מער ווי 500 מענטשן זענען שוין אומגעקומען זינט די שלאכטן האבן אויסגעבראכן א קנאפע וואך צוריק, וואס מאכט עס פאר די בלוטיגסטע קאמפן אין תימן זינט די לעצטע פייער-אפשטעל איז צאמגעפאלן. די חותיס, פון זייער זייט, באשולדיגן סאודי אראביע אין דורכפירן לופט-אטאקעס צו שטיצן די רעגירונג טרופן בעת די שלאכטן ווערן מער אינטענסיוו.

א קאארדינירטע סטראטעגיע

די יעצטיגע סעפטעמבער אפענסיווע איז א סאך א ברייטערע און מער קאארדינירטע שריט פון די רעגירונג ווי סיי וואס מען האט געזען אין די לעצטע מאנאטן. אנשטאט איין לאקאלע קאמף, זענען די שלאכטן יעצט צעשפרייט איבער מאריב, אל-דזשאוף, טאיז און אל-באידא אויף איין מאל, וואס צייגט אויף א קלארע סטראטעגיע צו לייגן דרוק אויף די חותיס פון עטליכע פראנטן גלייכצייטיג.

אנאליסטן וואס האלטן מיט דעם קאנפליקט ווייזן אן אז די טיימינג איז זייער אינטערעסאנט, קומענדיג אין די זעלבע צייט וואס די גאנצע מיטל-מזרח קאכט זיך מיט די אנגייענדע מלחמה מיט איראן, וואס שלעפט שוין סייווי אוועק די אויפמערקזאמקייט און רעסורסן אינעם ראיאן. מאריב אליינס האט א ריזיגע סטראטעגישע וויכטיגקייט, וויבאלד עס זיצט אויף טייל פון תימן'ס וויכטיגסטע אויל אינפראסטרוקטור. צו באשיצן די אויל קוועלער און צוריקכאפן פארלוירענע טעריטאריעס זעט אויס צו זיין די הויפט ציל פון די רעגירונג.

וואס ברענגט דער צוקונפט?

צי די רעגירונג וועט קענען אנהאלטן די פרישע געווינסן איז דערווייל אומקלאר, בפרט נעמענדיג אין אכט די היסטאריע פון די מלחמה אין תימן וואו פראנט ליניעס טוישן זיך כסדר. אין די פארגאנגענהייט האבן רעגירונג קראפטן שוין באוויזן צו מאכן פארשריט אין מאריב, נאר צו זען ווי די חותיס גרופירן זיך איבער און כאפן עס צוריק.

מיטל-מזרח עקספערטן ווארענען אז די יעצטיגע עסקילירונג טראגט אן ערנסטע ריזיקע צו אינגאנצן צוזאמווארפן דאס ביסל וואס איז געבליבן פון די 2022 פייער-אפשטעל, און קען צוריקשלעפן דאס לאנד אין א פולשטענדיגע ציווילע קריג. מיט די צאל טויטע וואס האלט שוין אין די הונדערטער און די קאמפן וואס פארשפרייטן זיך צו נאך פראווינצן, וועלן די קומענדיגע וואכן זיין קריטיש צו באשטימען צי די יעצטיגע אפענסיווע איז א טוירנינג-פוינט אדער בלויז נאך א קאפיטל אין תימן'ס לאנגע און בלוטיגע קאנפליקט.