לאנדאן: א 33-יעריגער מאן איז אנגעקלאגט געווארן נאך א רייע אטאקעס אויף אידישע פרויען אין סטאמפארד היל

די לאקאלע פאליציי האט פארשטארקט אירע פאטראלן אין די היימישע סטאמפארד היל געגנט אין לאנדאן, נאכדעם וואס א מאן האט אטאקירט עטליכע אידישע פרויען, אריינגערעכנט א פרוי וואס האט געשטיפט א בעיבי קערידזש, וואס האט ארויסגערופן גרויס זארג און פחד ביי די ארטיגע איינוואוינער.

די אטאקעס זענען פארגעקומען מאנטאג, אקטאבער 19, אין די קלעפטאן קאמאן געגנט וואו עס וואוינען אסאך היימישע אידן. לויט די מעטראפאליטאן פאליציי, האבן דריי אידישע פרויען געליטן פון לייכטע וואונדן אין די אינצידענטן. באריכטן פון די געגנט געבן איבער אז די קרבנות זענען געשלאגן געווארן אין פנים, אריינגערעכנט איין פרוי וואס איז פונקט געגאנגען אויפן גאס שטיפנדיג איר קינד אין א קערידזש.

די אינצידענטן האבן באלד אלארמירט די לאקאלע אידישע קאמיוניטי. די סטאמפארד היל שומרים זענען תיכף אראפגעקומען אויפן סצענע און ארויסגעגעבן סעקיוריטי קעמערע (CCTV) פוטעדזש וואס צייגט ווי דער פארברעכער גייט צו צו די פרוי מיט די קערידזש, גיט איר א שמיץ, און אנטלויפט פונעם ארט. א דאנק די שנעלע הילף פון די שומרים וואלאנטירן, וואס האבן ארויסגעהאלפן די פאליציי, האט מען באוויזן צו טרעפן און ארעסטירן דעם פארדעכטיגטן.

מיטוואך, אקטאבער 21, האט די פאליציי געמאלדן אז דער 33-יעריגער אבדיסאמאד סיאד פון איזלינגטאן איז אפיציעל אנגעקלאגט געווארן מיט דריי קלאגעס פון 'אסאלט' אין פארבינדונג מיט די אטאקעס אויף די דריי אידישע פרויען. ער האט זיך נאך יענעם טאג געשטעלט פאר א ריכטער אין געריכט.

די פאליציי האט אויך באשטעטיגט אז סיאד איז אין צוגאב אנגעקלאגט געווארן מיט א שווערע קלאגע פון פאראורזאכן ערנסטע קערפערליכע שאדן (GBH) אין א באזונדערע אינצידענט וואס האט פאסירט מיט אן אנדערע פרוי אין איזלינגטאן דעם 16'טן אקטאבער. די קלאגע האט נישט קיין שייכות מיט די סטאמפארד היל אטאקעס.

כאטש די אטאקעס אויף די אידישע פרויען ווערן באהאנדלט דורך די פאליציי אלס א מעגליכע 'העיט קריים', זענען די אפיציעלע קלאגעס דערווייל בלויז פאר אסאלט, און נישט קיין ספעציפישע רעליגיעזע אדער ראסיסטישע קלאגעס. נאך די פאסירונגען האט די פאליציי פארמערט אירע פאטראלן אין סטאמפארד היל און איז אין קאנטאקט מיט עסקנים און קאמיוניטי פירער צו בארואיגן די געמיטער און פארזיכערן די פובליק זיכערהייט.

די אטאקעס האבן אריינגעווארפן א שרעק אין די היימישע געגנט, א פלאץ וואו משפחות, פרויען און קינדער גייען טעגליך צופוס צו די בתי מדרשים, מוסדות און לאקאלע געשעפטן. די פאליציי האט געבעטן דעם ציבור צו בלייבן וואך און באריכטן סיי וואספארא פארדעכטיגטע אקטיוויטעטן בעת די אויספארשונג גייט אן.