קען מען פלאנצן קארטאפל אויף די לבנה? נאסא גרייט זיך צו שפייזן אסטראנאטן אויף א צוקונפטיגע לבנה-באזע

די אמעריקאנער ספעיס אגענטור 'נאסא' פלאנירט אויפצושטעלן א פערמאנענטע באזע אויף די לבנה אין די 2030'ער יארן, אבער איינע פון די גרעסטע פראגעס וואס פלאגט די סייענטיסטן איז גאנץ פשוט: וואס וועלן די אסטראנאטן עסן?

עס איז פיל גרינגער צו פלאנצן אייגענע עסן דארט ווי איידער צו שיקן יעדע מאל פרישע סופלייס פון די ערד. יעצט פראבירן סייענטיסטן אויסצוגעפינען צי די פשוט'ע קארטאפל קען טון די דזשאב.

אין א נייע ריסערטש פראדזשעקט וואס ווערט פינאנצירט דורך נאסא אין די 'ארעגאן סטעיט יוניווערסיטי', האבן פארשער פרובירט צו פלאנצן קארטאפל אין א ספעציעלע ערד וואס איז געמאכט נאכצומאכן די אויבערפלאך פון די לבנה. אבער זיי האבן געזען אז עס גייט נישט אן קיין הילף. די ריסערטשערס האבן צוגעלייגט 'קאמפאסט' - א ספעציעלע מאטעריאל וואס קומט פון ווערעם אפפאל און איז רייך אין נוטריענטן. מיט א געמיש פון 70 פראצענט נאכגעמאכטע לבנה-ערד און 30 פראצענט קאמפאסט, זענען ארויסגעוואקסן קארטאפל וואס מען האט כמעט נישט געקענט דערקענען קיין אונטערשייד צווישן זיי און נארמאלע קארטאפל.

אן די קאמפאסט זענען די פלאנצונגען געווען שוואך און קליין. די נאכגעמאכטע לבנה-ערד איז אזוי הארט און טרוקן, אז עס האט געדויערט ארום 24 טעג ביז די פלאנצונגען האבן אנגעהויבן ארויסצושפראצן, אין פארגלייך צו פיר ביז אכט טעג אין אנדערע געמישן.

אבער די רעזולטאטן קומען אויך מיט ווארענונגען וואס צייגט אז עס איז נאך דא א לאנגע וועג צו גיין. די קארטאפל וואס זענען געוואקסן אין די נאכגעמאכטע ערד האבן געוויזן העכערע שטאפלען פון קופער און זינק, וואס די פארשער זאגן אז עס קען זיין א פראבלעם פאר מענטשן עס צו עסן, כאטש די נוטרישענעל ווערד איז געווען ענליך צו נארמאלע קארטאפל.

אינדרויסנדיגע עקספערטן ווייזן אויך אן אז די טעסטס זענען געמאכט געווארן מיט נאכגעמאכטע ערד, נישט קיין עכטע זאמד פון די לבנה, און מען האט נישט נאכגעמאכט די שווערע ראדיאציע און די 'וואקיום' אטמאספערע פון די לבנה.

לויט די פלאן, וועט מען לכתחילה דארפן ארויפברענגען די קאמפאסט פון די ערד, און שפעטער וועט די באזע קענען נוצן איר אייגענע ביאלאגישע אפפאל. דערווייל טעסטן די ריסערטשערס וועלכע סארט קארטאפל קען זיך דאס בעסטע אן עצה געבן אין די אומשטענדן, און די גרויסע פראגע בלייבט צי א צוקונפטיגע 'פארמער' אויף די לבנה וועט טאקע קענען פלאנצן א פרישע מאלצייט דארט.