סאודי אראביע מעלדט פלאן צו בויען די וועלט'ס גרעסטע נעצווערק פון זעלבסט-פארנדיגע טראקס

סאודי אראביע האט געמאלדן פלענער צו בויען וואס זיי רופן אן די וועלט'ס גרעסטע נעצווערק פון אטאנאמישע (זעלבסט-פארנדיגע) טראקס. דאס וועט צושטאנד קומען דורך א קאאפעראציע צווישן צוויי גרויסע פירמעס: "היומעין" (HUMAIN), א סאודישע AI פירמע וואס ווערט געשטיצט דורך די קעניגרייך'ס פובליק אינוועסטמענט פאנד, און "עפלייד אינטואישן" (Applied Intuition), א קאליפארניע-באזירטע פירמע. דער ציל איז ארויסצושטעלן טויזנטער זעלבסט-פארנדיגע טראקס אויף די הויפט לאגיסטיק רוטס ביז יאר 2030.

די איניציאטיוו איז א טייל פון א ברייטערע סטראטעגיע ארויסצוברענגען ארטיפישעל אינטעלידזשענס (AI) פון די קאמפיוטערס און דאטא-צענטערן, און עס אריינברענגען אין פיזישע מאשינען וואס פירן סחורה און מענטשן אין די רעאלע וועלט. די קאליפארניע פירמע ברענגט מיט זיך טעכנאלאגיע וואס איז שוין אויסגעפרובירט געווארן מיט הצלחה, און זייער 'לעוועל 4' זעלבסט-פארנדיגע סיסטעם אפערירט שוין יעצט אויף טראקס אין אמעריקע, אייראפע און יאפאן.

וואס מאכט דעם פראדזשעקט אזוי אויסערגעווענליך איז די מאסיווע פארנעם דערפון. אנשטאט אנצוהייבן מיט א קליינע צאל פראבע-טראקס אויף איין גאס, צילן די צוויי פירמעס צו טראנספארמירן דעם גאנצן פראכט-נעצווערק פונעם לאנד אויף איין מאל. דער הויפט פון 'היומעין', טארעק אמין, האט עס אראפגעלייגט אז דער ציל איז צו טוישן די גאנצע ווירטשאפט פון פירן סחורה. ער זאגט אז טויזנטער טראקס וואס וועלן פארן ארום די זייגער וועלן פארשנעלערן לאגיסטיקס, שניידן קאסטן און פארברייטערן די מעגליכקייטן אינעם ראיאן. די טראקס וועלן לויפן אויף די זעלבסט-פארנדיגע סיסטעם און 'Vehicle OS' סאפטווער פון די קאליפארניע פירמע, וואס איז געבויט צו קענען אפערירן אויף א ריזיגע פארנעם.

פראכט טראנספארטאציע איז אבער בלויז דער אנהייב. איינמאל די זעלבסט-פארנדיגע טראקס וועלן זיין סטאביליזירט, פלאנירן די פירמעס צו פארברייטערן די זעלבע טעכנאלאגיע צו ראבא-טעקסיס, פארטן, מינעס, פאבריקן, אגריקולטור און קאנסטראקשן, און בויען א ברייטע עקא-סיסטעם פון פיזישע AI איבער סאודי אראביע. דאס גייט האנט-אין-האנט מיט סאודי אראביע'ס "וויזיע 2030" צילן, וואס זוכט צו פארברייטערן די עקאנאמיע און בויען לאקאלע טעכנאלאגישע מעגליכקייטן אנשטאט זיך צו פארלאזן אינגאנצן אויף אימפארטירטע סיסטעמען. די דאטא צענטערן וועלן זיין סטאנציאנירט אין סאודי אראביע זעלבסט, וואס וועט געבן פאר'ן קעניגרייך פולע קאנטראל אויף די AI סיסטעמען וואס פירן זייער טראנספארטאציע נעצווערק.

דערווייל זענען אבער נאך דא אסאך דעטאלן וואס זענען נישט קלאר, און דער וועג ביז 2030 וועט ווארשיינליך קומען מיט ערנסטע טעכנישע און לאגיסטישע שוועריגקייטן. די פירמעס האבן נאך נישט ארויסגעגעבן פונקטליך וויפיל טראקס עס וועלן ארויסגעשטעלט ווערן, וועלכע רוטס וועלן זיין די ערשטע, וועלכע טראק פראדוצירער וועלן זיין פארמישט, אדער ווען די קאמערציאלע אפעראציעס וועלן זיך פאקטיש אנהייבן. מען וועט אויך דארפן זען וויאזוי די סיסטעם וועט זיך ספראווען מיט אומגעריכטע וועג-צושטאנדן אדער זעלטענע פעלער בעפאר מען וועט קענען לאזן די טראקס פארן אן קיין דרייווערס אויף א גרויסן פארנעם.

טראץ די אלע פראגעס, איז די פאטענציאלע געווינס גאר גרויס. שטיצער פונעם פראדזשעקט ווייזן אן אויף פארנומענע שאסייען ווי די רוט צווישן ריאד און אנדערע גאלף שטעט אלס הויפט קאנדידאטן צו לייזן דעם כראנישן מאנגל אין טראק דרייווערס, און זיי זאגן אז אויב די טעכנאלאגיע וועט זיך אויסארבעטן ווי געפלאנט, קען דאס אינגאנצן איבערמאכן דעם אופן וויאזוי סחורה ווערט טראנספארטירט אינעם גאנצן ראיאן.