טראגעדיע אין צפון ארץ ישראל: 15-יעריגער בחור אומגעקומען און 19 פארוואונדעט נאכדעם וואס אן אלטע באמבע האט אויפגעריסן אויף א שולע טריפ

א שוידערליכע טראגעדיע האט פאסירט מאנטאג אין צפון ארץ ישראל, ווען א 15-יעריגער בחור איז ל"ע אומגעקומען און נאך 19 זענען פארוואונדעט געווארן, נאכדעם וואס אן אומאויפגעריסענע באמבע האט עקספלאדירט אינמיטן א שולע טריפ נעבן קיבוץ יפתח.

די קרבנות זענען תלמידים און סטעף מיטגלידער פון די "אורט מעלות" ישיבה היי-סקול, וועלכע זענען ארויסגעפארן אויף א יערליכע טריפ אויפן באקאנטן 'שביל ישראל' ראוט נעבן מצפה פאר אין די אויבערשטע גליל.

לויט די ערשטע אויספארשונגען, האט איינע פון די תלמידים געטראפן אן אלטע אומאויפגעריסענע באמבע אויפן וועג און עס אריינגעלייגט אין זיין בעקפעק. די באמבע האט פלוצלינג אויפגעריסן נעבן אנדערע תלמידים און סטעף, ברענגענדיג צו די שרעקליכע פאטאלע רעזולטאטן. די פאליציי פארשט ווייטער די פונקטליכע אומשטענדן פונעם אינצידענט.

עטליכע פון די פארוואונדעטע זענען באריכטעט געווארן אין אן ערנסטן צושטאנד, וואס האט געפירט צו א מאסיווע רעספאנס פון עמערדזשענסי קרעפטן. מגן דוד אדום, איחוד הצלה, צענדליגע אמבולאנסן און רעטונג העליקאפטערס זענען אראפגערופן געווארן צום סצענע. די רעטונגס ארבייטער האבן אפגעפירט די פארוואונדעטע צו די ארומיגע שפיטעלער, בשעת באמבע סקוואדס האבן אונטערגעזוכט די גאנצע געגנט צו מאכן זיכער אז עס געפינען זיך נישט דארט נאך אומאויפגעריסענע מאטעריאלן.

די מעלות-תרשיחא שטאטראט האט באשטעטיגט אז תלמידים און סטעף פון די לאקאלע שולע זענען פארמישט אינעם עקסידענט, און האבן איבערגעגעבן אז שטאטישע באאמטע קאארדינירן מיט די עמערדזשענסי און עדיוקעישאן אגענטורן צוצושטעלן הילף פאר די באטראפענע פאמיליעס.

די טראגעדיע האט אויפגעוועקט א פרישע שטורעם און גרויס זארג איבער די סכנה פון אלטע אומאויפגעריסענע באמבעס וואס זענען איבערגעבליבן אין געגנטער וואו שולע גרופעס און הייקערס דרייען זיך.