געפארפולע מיסיע: סייענטיסטן זאמלען קאכעדיגע 'לאווא' פון האוואי וואולקאנען צו שטודירן אונטערערדישע געפארן

סייענטיסטן פונעם 'יו-עס דזשיאלאדזשיקעל סורוועי' (USGS) האוואי וואולקאן אבזערוואטאריע פירן דורכאויס די טעג א גאר געפארפולע פעלד-ארבעט נעבן די אקטיווע וואולקאנען אין האוואי. זיי זאמלען סעמפלס פון צעלאזטע, קאכעדיגע לאווא כדי בעסער צו פארשטיין די פראצעסן וואס קומען פאר טיף אונטער די אינזלען.

אין א ווידעא וואס איז פארעפנטליכט געווארן דורך די אמעריקאנער אינטעריער דעפארטמענט, קען מען זען ווי די פארשער זענען אנגעטון מיט ספעציעלע שוץ-קליידונג בעת זיי דערנענטערן זיך צו די אפגעקילטע לאווא פעלדער. מיט די הילף פון ספעציעלע געצייג קלאפן זיי און שעפן ארויס די פייערדיגע רויטע וואולקאנישע מאטעריאל אריין אין ספעציעלע קאנטעינערס. כאטש די ארבעט קומט פאר אונטער גאר שווערע אומשטענדן, זענען די סעמפלס גאר וויכטיג צו געבן פאר די פארשער א קלארערע בילד איבער די באשטאנדטיילן און אויפפירונג פון די 'מאגמא' וואס רירט זיך אונטער די ערד-פלאך.

מאניטארן די אקטיוויטעטן

דורך אנאליזירן די כעמישע באשטאנדטיילן פון די לאווא און כסדר'דיג מאניטארן די וואולקאנישע אקטיוויטעטן, קענען די סייענטיסטן אויפכאפן טוישונגען וואס קענען דינען אלס א סיגנאל אז עפעס רודערט זיך אין די אונטערערדישע מאגמא סיסטעמען. זייערע אויספארשונגען נעמען אויך אריין דאס מאניטארן ערדציטערנישן, שטודירן די אויסברוך מוסטערן, און דאקומענטירן סיי וועלכע טויש אין די וואולקאנישע אקטיוויטעטן, ספעציעל ארום דעם באקאנטן 'קילאוועא' (Kīlauea) און אנדערע אקטיווע וואולקאנען אין האוואי.

פובליק סעיפטי און פאראויסזאגן געפארן

די דאזיגע פארשונג שפילט א גאר וויכטיגע ראלע אין פארשטיין די וואולקאנישע געפארן און העלפט די לאקאלע אויטאריטעטן צו באשיצן די איינוואוינער וואס וואוינען אין די ארומיגע קאמיוניטיס. ערדציטערנישן, טוישונגען אין די לאווא, און דאס נאכפאלגן די אויסברוכן געבן פאר די סייענטיסטן קריטישע שפורן איבער וואס עס קומט פאר אונטערן וואולקאן און וויאזוי עס קען זיך מעגליך אנטוויקלען.

מיט'ן צוזאמשטעלן די דירעקטע פעלד-אבזערוואציעס אינאיינעם מיט סעיסמישע מאניטארינג און לאבאראטאריע אנאליזן, קענען די USGS פארשער אהערשטעלן וויסנשאפטליכע שאצונגען וואס העלפן פאראויסזאגן געפארן און מאכן קריטישע פובליק סעיפטי באשלוסן. די אינפארמאציע העלפט עמערדזשענסי באאמטע און די לאקאלע קאמיוניטיס זיך בעסער צוצוגרייטן פאר מעגליכע ריזיקעס בעת א צייט אפשניט פון פארמערטע וואולקאנישע אקטיוויטעטן. כאטש די סייענטיסטן קענען נישט פאראויסזאגן יעדע וואולקאנישע פאסירונג מיט א הונדערט פראצענטיגע זיכערקייט, גיט זייער כסדר'דיגע מאניטארינג די נויטיגע אינפארמאציע צו אידענטיפיצירן ווארענונג-צייכנס און רעדוצירן די געפארן פון קומענדיגע אויסברוכן.