סעקרעטערי אוו סטעיט מארקא רוביא מיט קלארע מעסידזש: "אמעריקע קומט בעפאר די יונייטעד נעישאנס"

סעקרעטערי אוו סטעיט מארקא רוביא האט ארויסגעשטעלט איינע פון די קלארסטע און שארפסטע מעסידזשעס ביז איצט איבער ווי אזוי די טראמפ אדמיניסטראציע קוקט אן די וועלט. אין זיינע ווערטער, באדייט די "אמעריקע פוירסט" פאליסי אז מען גייט אלעמאל טון וואס איז ריכטיג און גוט פאר אמעריקע בעפאר סיי וואס אנדערש, אפילו בעפאר די יונייטעד נעישאנס (יו-ען) און די גלאבאלע ארדענונג, וועלכע לויט אים, האבן פאליטישאנס אין וואשינגטאן "געדינט ווי אן אפגאט" פאר א זייער לאנגע צייט.

רוביא האט אבער קלארגעשטעלט אז די אדמיניסטראציע איז נישט קעגן די דאזיגע אינטערנאציאנאלע אינסטיטוציעס, נאר פשוט אז מען וועט זיי מער נישט שטעלן העכער די אמעריקאנער אינטערעסן. ער האט געגעבן דעם קרעדיט פארן פרעזידענט פארן פירן דעם צוגאנג. דאס איז אין איינקלאנג מיט וואס רוביא האט שוין עטליכע מאל פריער געזאגט, אריינגערעכנט ביי זיין סענאט קאנפירמעישאן פארהער וואו ער האט אנגערופן די נאך-מלחמה גלאבאלע סיסטעם אלס "פארעלטערט", און ביי זיינע רעדעס דעם פארגאנגענעם סעפטעמבער אין די זייט פון די יו-ען דזשענעראל אסעמבלי, וואו ער האט אראפגעריסן די אינטערנאציאנאלע סיסטעם אלס א דורכפאל.

שטיצער פונעם נייעם מהלך זען דאס אלס א לענגסט-ערווארטעטע רעאליזם, אנווייזנדיג אויף די פראגעס וואס רוביא אליינס האט אויפגעברענגט, צי די גלאבאלע ארגאניזאציעס האבן טאקע אמאל געהאלפן שליכטן קאנפליקטן ווי צווישן טיילאנד און קאמבאדיע, אינדיע און פאקיסטאן, קאנגא און רוואנדע, אדער די אנגעצויגנקייטן ארום די הארמוז דורכגאס.

פון די אנדערע זייט, ווארענען קריטיקירער אז דאס קען ברענגען ערנסטע ריזיקעס, זאגנדיג אז דאס אראפשפילן די וויכטיגקייט פון אינטערנאציאנאלע אינסטיטוציעס קען אנשטרענגען אליאנצן, אפשוואכן קאאפעראציע אויף געמיינזאמע פראבלעמען, און איבערלאזן מער פלאץ פאר אמעריקע'ס קעגנער צו דיקטירן די רעגולאציעס אויף דער וועלט.

רוביא האט אויך באטאנט אז לענדער מוזן אליינס זארגן פאר זייער אייגענע זיכערהייט ווען די אינטערנאציאנאלע סיסטעם דעליווערט נישט, און ער האט זיך געהאלטן ביי דעם אז דער צוגאנג איז נישט קיין 'איזאלאציאניזם' (זיך אפטיילן פון דער וועלט). עס בלייבט אבער אומקלאר ביז ווי ווייט די דאזיגע פילאסאפיע וועט טוישן אמעריקע'ס באציאונגען אין די רעאליטעט, און צי די איבריגע וועלט וועט זיך צופאסן דערצו אדער צוריקשלאגן.