אידישע און פאליטישע פארשטייער דריקן אויס הכרת הטוב פאר מאלדאווע ביי איר 35-יאריגער פייערונג – קאנגרעסמאן מייק לאולער אדרעסירט די פייערונג – שליח רבני ברסלב הרה"ח ר' משה דוד נידערמאן הי"ו גיבט איבער דאנק-פלעק ביי פריוואטער באגעגעניש
גאלערי
ביי דער פייערונג לכבוד מאלדאווע'ס 35 יאר זעלבסטשטענדיגקייט, איז אויסגעהויבן געווארן די איבערגעגעבענע הילף פון דער מאלדאווישער רעגירונג, און ספעציעל פונעם אמבאסאדאר אין אמעריקע, פאר די טויזנטער ברסלבר חסידים וועלכע זענען דורכגעפארן דאס לאנד אין די פארלאפענע ימי ראש השנה אויפן וועג קיין אומאן.
קאנגרעסמאן מייק לאולער האט אדרעסירט דעם ציבור דורך "זום" און אויסגעדריקט ווארמע דאנק-ווערטער פארן אמבאסאדאר פאר זיין איבערגעגעבנקייט צו ערמעגליכן פאר די טויזנטער אמעריקאנער בירגער איבערצוגיין די גרעניצן גרינגער און שנעלער. דער קאנגרעסמאן האט אליין געשפילט א שטארקע ראלע אין די באמיאונגען פאר די רייזנדע דורך זיין פערזענליכער אריינמישונג און דירעקטער צוזאמענארבעט מיטן מאלדאווישער אמבאסאדאר. אין שפיץ פון די ארבעט איז געשטאנען זיין געטרייער שטאב און סטעף, מר. ראפי זילבערבערג, וואס האט עס באגלייט רונדע דעם זייגער און זיך איבערגעגעבן פארן וואוילזיין פון די טויזנטער חסידי ברסלב.
באזונדער האט דער אמבאסאדאר אפגעהאלטן א פריוואטע זיצונג אין דער אמבאסאדע מיט השתדלן הרה"ח ר' משה דוד נידערמאן הי"ו, אינאיינעם מיט ברסלבר עסקנים. ר' משה דוד איז געווארן פארבעטן דורך די גדולי רבני ברסלב שליט"א זיך אריינצומישן און שתדל'ן פאר די אומאן-רייזנדע ביי די גרעניצן. ביי דער געלעגנהייט האט זיך ר' משה דוד פערזענליך באדאנקט פארן אמבאסאדאר פאר זיינע געטרייע לייסטונגען לטובת די טויזנטער חסידי ברסלב, און אים איבערגעגעבן א ספעציעלע דאנק-פלעק אלס אויסדרוק פון טיפער הכרת הטוב פאר זיין איבערגעגעבענער ארבעט.
ביי דער באגעגעניש איז ספעציעל אויסגעהויבן געווארן די פערזענליכע איבערגעגעבנקייט פונעם אמבאסאדאר. טראץ וואס זיין פאטער איז געשטארבן פונקט אין יענע טעג, האט ער נישט אפגעלאזט די ארבעט, נאר ווייטער געשטאנען אין פארבינדונג מיט די העכסטע גרעניץ-באאמטע און דעם אויסערן-מיניסטעריום צו פארגרינגערן די פראצעדורן און פארשנעלערן דעם איבערגאנג. דערביי האט דער אמבאסאדאר זיך ספעציעל געזארגט פארן שנעלן און זיכערן דורכגאנג פון די גדולי רבני ברסלב שליט"א און אמעריקאנער בירגער מיט פאראויס-רעגיסטראציע.
די געמיינזאמע שתדלנות פון קאנגרעסמאן לאולער און הרה"ח ר' משה דוד שליט"א האט געברענגט א ספעציעלע צוזאמענארבעט מיט דער מאלדאווישער רעגירונג אין די טעג פאר און נאך ראש השנה, און עס איז צום האפן ווייטער אנצוהאלטן די גוטע קאאפעראציע לטובת די טויזנטער אידן וועלכע פארן צום ראש-השנה-קיבוץ אין אומאן.