היסטארישע קריזיס אין פוילן: פאליציי רינגלט ארום דעם העכסטן געריכט נאך דראמאטישע איבערקערעניש אינמיטן די נאכט

ווארשע. – די לאנג-פארצויגענע קאמף איבער פוילן'ס קאנסטיטוציאנאלע טריבונאל (העכסטע געריכט) האט אויסגעבראכן אין א פולשטענדיגע קריזיס דורכאויס די נאכט צווישן פרייטאג און שבת, ווען פאליציי קרעפטן האבן ארומגערינגלט די הויפטקווארטיר פונעם געריכט אין דער הויפטשטאט ווארשע.

דאס קומט נאכדעם וואס א ריכטערין האט דראמאטיש געמאלדן אז זי סוספענדירט דעם פרעזידענט פונעם טריבונאל, באגדאן סוויעטשקאווסקי, און דעם וויצע פרעזידענט, בארטלאמיעי סאטשאנסקי, פאר איין חודש, און זי נעמט איבער די פירערשאפט פונעם געריכט. ביידע זענען לויט באריכטן נישט אריינגעלאזט געווארן אינעם געביידע. אינדרויסן האבן זיך פארזאמלט הונדערטער פראטעסטירער וועלכע האבן זיך קאנפראנטירט מיט די ראיאטן פאליציי, וואו דריי מענטשן זענען ארעסטירט געווארן און עטליכע זענען פארוואונדעט געווארן.

דער פוילישער פרעזידענט קאראל נאווראצקי האט איבערגעריסן א רייזע קיין סענעגאל און זיך געאיילט צום געביידע, וואו ער האט דערקלערט אז דאס איז א "געוואלדטאטיגע איבערנעמונג" פון א קאנסטיטוציאנאלע קערפערשאפט. ער האט אריינגעלאזט דעם וויצע פרעזידענט סאטשאנסקי אינעם בנין, און קלארגעשטעלט פאר די ריכטערין וואס האט איבערגענומען די פירערשאפט אז זי איז בכלל נישט קיין ריכטערין אינעם טריבונאל. דער פרעזידענט האט דאן גערופן פאר דרינגנדע געשפרעכן מיט די פארלאמענטארע פארטייען.

דער פוילישער מיטגליד אינעם אייראפעאישן פארלאמענט, דאמיניק טארטשינסקי, האט אראפגעריסן די פאסירונגען אלס א "פוטש", און ער האט געווארנט אמעריקאנער בירגער אז דאס זעלבע קען פאסירן אין די פאראייניגטע שטאטן אויב די לינקע נעמען איבער די מאכט. ער האט טענה'ט אז זיינע קעגנער ווילן איבערנעמען קאנטראל פונעם געריכט כדי זיי זאלן זיין באשיצט נאכן פארלירן די קומענדיגע יאר, און ער האט עס צוגעגליכן צו די פאליטישע קאמפן אין אמעריקע איבער די סופרים קאורט.

די רעגירונג זעט אבער די סיטואציע אינגאנצן אנדערש און זאגט אז דאס זענען בלויז פאליטישע קלעימס. די אדמיניסטראציע פון פרעמיער מיניסטער דאנאלד טוסק אנערקענט בכלל נישט די לעגיטימיטעט פונעם טריבונאל, אנגעבנדיג אז טייל פון די ריכטער זענען אומלעגאל אויפגענומען געווארן אונטער די פריערדיגע 'לאו ענד דזשאסטיס' רעגירונג. זיי ווייזן אן אז די אייראפעאישע קאורט פאר מענטשנרעכט האט פארארדנט דעם טריבונאל צו אקצעפטירן פיר ריכטער וואס זענען אויסגעקליבן געווארן דורכ'ן פארלאמענט.

יעדע זייט באשולדיגט דעם צווייטן אין ברעכן די קאנסטיטוציע, און עס זעט אויס אז דער קאמף איבער ווער עס פירט באמת פוילן'ס העכסטע געריכט איז נאך ווייט פון פאריבער.