בס"ד

ווידעא: א 'וועסט-דזשעט' פליגער קראכט אריין אין א קעיטערינג טראק ביים טאראנטא עירפארט

נייע זיכערהייט קאמערע ווידעא צייגט דעם מאמענט ווי א 'וועסט-דזשעט' באאינג 737 מעקס 8 פליגער האט זיך אנגעשטויסן אין א געפארקטע קעיטערינג טראק ביים טאראנטא פירסאן אינטערנאציאנאלע עירפארט, דינסטאג ביינאכט. אין די ווידעא זעט מען ווי דער פליגער רוקט זיך פאמעליך אין די טונקל, בעת די שפיץ פונעם פליגל (ווינגלעט) קראכט אריין אינעם טראק. דער קראך האט ארויסגעגעבן א העלע בליץ פון ליכט און ווי עס שיינט האט עס איבערגעלאזט שאדנס צום אויבערשטן טייל פונעם טראק.

דער פליגער, וועלכע טראגט דעם רעגיסטראציע נומער C-FRYV, איז צוריקגעקומען פון פלייט WS2221 פון פוערטא וואלארטא און איז שוין געווען אינגאנצן ליידיג נאכדעם וואס אלע פאסאזשירן האבן שוין אפגעטרעטן. דער אינצידענט האט פאסירט בשעת מען האט געשלעפט דעם פליגער פונעם געיט צו אן איבערנאכט פארקינג פלאץ. די 'וועסט-דזשעט' עירליין האט באשטעטיגט אז די פליגל פונעם עראפלאן האט זיך אנגעשטויסן אינעם טראק, און די 'קאנאדישע טראנספארטאציע סעיפטי בארד' האט אויך באשטעטיגט דעם אינצידענט. ברוך השם עס זענען נישט באריכטעט געווארן קיין שום פארוואונדעטע.

כאטש וואס צוזאמענשטויסן צווישן פליגערס און גראונד-טראקס זענען נישט קיין אפטע ערשיינונג, פאסירט עס אבער פון צייט צו צייט אין פארנומענע עירפארטס, וואו פליגערס, שלעפערס און סערוויס טראקס טיילן זיך מיט שמאלע פלעצער, אפטמאל אין די טונקל. אין דעם פאל איז דער פליגער געווארן געשלעפט און נישט געווען אין א פלייט מיט פאסאזשירן, וואס דאס איז ווארשיינליך די סיבה פארוואס די שאדן איז געבליבן בלויז ביי די מאשינען.

די הויפט פראגע וואס מען פרעגט זיך איז אבער ווי אזוי די פליגל האט זיך אנגעשטויסן אין א געפארקטע טראק, און דערווייל איז נאך נישט געמאלדן געווארן די אורזאך דערפון. עס איז אויך נאך נישט קלאר ווי שטארק די שאדן צום פליגער אדער צום טראק איז, און ווי לאנג דער פליגער וועט זיין ארויס פון באנוץ. דערווייל דינט די ווידעא אלס א דערמאנונג אז אפילו די רואיגסטע טייל פונעם טאג ביי אן עירליין - ווען א ליידיגע פליגער ווערט געשלעפט צום שלאפן - קען זיך אויך ענדיגן מיט אן אומגעראכטענע דראמע.