אינטענסיווע לעצט מינוטיגע באגעגעניש צווישן משפיעי ברסלב און אוקראינישע רעגירונגס באאמטע לקראת דעם הויפט 'קיבוץ' אין אומאן

אין די קריטישע שעות ארום 24 שעה בעפאר מען האט אריין געטרעטן אין דער הייליגער יום טוב ראש השנה, איז אפגעראכטן געווארן א ספעציעלע און וויכטיגע קאנפערענץ צווישן הויכראנגיגע אוקראינישע רעגירונגס באאמטע און פאליציי קאמאנדירן וועלכע פארטרעטן דעם פרעזידענט איבער די אנגעלעגנהייטן פונעם קיבוץ און די חשוב'ע רבנים און משפיעים פון חסידי ברסלב.

די עמטליכע זיצונג, וואס ווערט שוין אפגעראכטן צום ניינטן יאר נאכאנאנד אויפן פארלאנג פון די אוקראינישע רעגירונג, איז פארגעקומען אינעם צענטראלן זאל פון 'איחוד ברסלב' סמוך צום קלויז. דער ציל פונעם צוזאמקום איז געווען דורכצונעמען די לעצטע צוגרייטונגען און זיכערהייטס אנווייזונגען לקראת דעם גרויסן ראש השנה צוזאמפאר.

דער צוזאמקום איז אנגעפירט געווארן דורך דעם יו"ר פון 'איחוד ברסלב באומן', הרב נתן בן נון שליט"א.

בראשות הגה"צ רבי משה קרעמער שליט"א, און הגאון ר' יעקב שילוח שליט"א, דער אפיציעלער רב פון אומן און דומ"ץ ברסלב צפת.

צווישן די באטייליגטע האבן זיך אנגעזען די אנגעזעענע מנהיגים און משפיעים: הגה"ח ר' אפרים קעניג שליט"א, הגה"ח ר' נתן מימון שליט"א, הגאון ר' צבי ליבערמענטש שליט"א, הגה"ח ר' אברהם שמעון בורשטיין שליט"א, הגה"ח ר' שמעון טייכנער שליט"א, הגה"ח ר' שמעון אליהו ברוין שליט"א, הגה"ח ר' יעקב קעניג שליט"א, אינאיינעם מיט פילע אנדערע חשוב'ע עסקנים און הויפט גבאים פונעם קלויז.

הויכראנגיקע פאליציי קאמאנדירן און ספעציעלע פארשטייער פון די אוקראינישע געהיים דינסט אגענטור (SBU) פון קיעוו.

דער SBU קאמאנדיר פונעם גאנצן טשערקאסער ראיאן, אינאיינעם מיט דעם לאקאלן SBU קאמאנדיר אין אומן.

דער הויפט פאליציי קאמאנדיר וועלכער איז דירעקט פאראנטווארטליך אויפן זיכערהייט פונעם גאנצן יום טוב, באגלייט מיט מתנות פון די לאקאלע זיכערהייטס כוחות.

די פראגראם איז פראפעסיאנאל געפירט געווארן דורך הרה"ח ר' נחמן צבי געווירץ שליט"א, מיט די הילף פון א לאקאלן איבערזעצער וועלכער האט געדינט אלס דער קאמוניקאציע מיטלמאן צווישן די צדדים.

הרב נתן בן נון שליט"א האט געעפנט דעם מעמד בשם די רבנים מיט ווארעמע דברי ברכה און טיפע דאנקבארקייט צום אוקראינישן פאלק און רעגירונג, ארויסברענגענדיג זייער קריטישן חלק אין די סוקסעספולע פארווירקליכונג פונעם קיבוץ טראץ די קאמפליצירטע אומשטענדן.

דער הויפט פאליציי קאמאנדיר פון קיעוו האט באטאנט אז די רעגירונג זענען פולשטענדיג גרייט אויפצונעמען די פילע צענדליגער טויזנטער חסידים, מיט שאצונגען פון העכער 60,000 אידן פון מער ווי 46 לענדער. ער האט קלארגעשטעלט די ערנסטע זיכערהייטס פראבלעמען אין שאטן פונעם אנגייענדן קריג, און האט פארלאנגט פון די רבנים צו פאדערן פונעם ציבור א הונדערט פראצענטיגע פאלגזאמקייט צו אלע געזעצן און אינסטרוקציעס אן קיין אויסנאם.

עטליכע פון די חשוב'ע משפיעים האבן אויפגעטראטן, ארויסברענגענדיג זייער טיפן דאנק פאר די רעגירונג פארן ערמעגליכן דעם המשך פון די הייליגע טראדיציע וואס ווערט שוין אנגעהאלטן מיט אומגעהויערע מסירות נפש פאר העכער צוויי הונדערט יאר נישט קוקנדיג אויפן שווערן מלחמה צושטאנד. דער מעמד איז געשלאסן געווארן מיט דברי ברכה פון הגה"צ רבי משה קרעמער שליט"א פאר די רעגירונגס באאמטע.

(קרעדיט פארטאגראפיע: אוקראינישע SBU)