אין ווייטערדיגע באריכטן פונעם מסע התעוררות צו די קברי צדיקים אין אייראפע בראשות כ"ק אדמו"ר מסאטמאר שליט"א, האט דער רבי שליט"א היינט זונטאג צופרי פוקד געווען דעם ציון הק' פונעם מופת הדור דער הייליגער מנוחת אשר זי"ע אין שטאט טשענגער, און דערביי אפגעראכטן א מעמד קביעת מזוזה צום נייעם פרעכטיגן בנין הכנסת אורחים אין שטאט.

מוצש"ק שפעט ביינאכט האט זיך דער רבי שליט"א ארויסגעלאזט פון סיגוט, רומעניע, אריבערפארנדיג דעם גרעניץ קיין אונגארן, אויפ'ן וועג קיין אוהעל. ארום פיר אזייגער פארטאגס האט זיך דער רבי שליט"א אפגעשטעלט על אם הדרך אין שטאט טשענגער, אויף א לינת לילה.

אנקומענדיג האט דער רבי צוערשט קובע געווען א מזוזה אויפ'ן אייגענעם צימער, אינעם נייעם בנין הכנסת אורחים. ארום זיבן אזייגער צופרי איז דער רבי אריבער צו די נייע הערליכע מקוה, וואס איז געווען פולקאם צוגעגרייט און געהייצט, צוגעשטעלט מיט אלע צוגעהערן, אויף וואס דער רבי שליט"א האט שטארק באדאנקט און אויסגעדרוקט התפעלות פון די פעולות אויפצובויען דעם בנין הכנסת אורחים און אלעס ארום.

דערנאך האט דער רבי קובע געווען מזוזות אויפ'ן נייעם בנין הביהמ"ד, און דערנאך אויסגעדרוקט השתוקקות ארויפצוגיין על ציון קדשו פונעם מנוחת אשר, מתפלל זיין ביום המסוגל ער"ח, דערמאנענדיג אז דער ייטב לב האט זיך אויסגעדרוקט אז דער מנוחת אשר איז דער מופת הדור. דער רבי איז אריבער דעם קורצן וועג צום בית החיים, וואס געפינט זיך א שפאן אוועק פונעם בנין הכנסת אורחים, און דערציילט סיפורי קודש פונעם מנוחת אשר.

אנקומענדיג צום אהל הק' האט דער רבי געצינדן פינף ליכט און מתפלל געווען מיט גרויס התעוררות ספר רביעי שבתהילים. אויפ'ן וועג ארויס האט זיך דער רבי באדאנקט פאר די עסקנים און ווידער ערווענט מיט התפעלות די פעולות חשובות אהערצושטעלן דעם מקום מיט אלע באקוועמע צוגעהערן פאר די שופכי שיח וואס קומען מתפלל זיין ביים מנוחת אשר.