אין די לעצטערע וואכן איז אריין אין שוואנג אין קרית טאהש די ברייט פארצווייגטע ארבעט פון גענצליך איבערמאכן די אלטע ראוד'ס פון קרית טאהש.

קרית טאהש איז געבויט געווארן דורך הרה''ק מ'טאהש זי''ע מיט אומגעפער 60 יאהר צוריק, און דאן אויפגעבויט די הייליגע שטעטל און די ישיבה וואס שטייט על מכונו על תילו מיט א געוואלדיגע בליה און וואוקס ביז'ן היינטיגן טאג.

במשך די יארן זעהנדיג די געוואלדיגע רויבי עם פון תושבים און פולע חסידים וואס קומען קיין טאהש, וואקסט כסדר די שטעטל מיט פילע איינרוכטונגען ווי נאך הייזער, ברייטערע ראוד'ס, פולע סטאר'ס, און אלע באדערפענישן וואס עס פעלט זיך אויס אין א יודישע שטאט.

ארבעטנדיגע כסדר אויף פרישע פראדזשעקס האט מען קיינמאל נישט איבערגעמאכט די ראוד פון די אלטע חלק שטעטל, וואס איז אין לויף פון די יארן געווארן גאר שטארק צוהאקט און צובראכן, אזש ס'געווען גאר שווער צו פארן דערויף, דעריבער האבן זיך די געטרייע הנהלת הקריה ארינגעלייגט אין די מולטי מיליאן דאלאר פראיעקט פון גענצליך איבערמאכן די ראוד'ס להנאת התושבים.

די פראיעקט איז שוין טיף אריין אין שוואנג ווען יעדן טאג זענען צענדליגע ארבעטער'ס אויפן סצענע ווי מ'גראבט אויף די אלטע ראוד'ס מ'נעמט ארויס די אלטע סאוער סיסטעם און מ'אינסטאלירט גענצלי נייע סיסטעם פאר די וואסער א.א.וו.

כדי צו פארגרינגערן די אלע תושבים צו קענען וויטער אנגיין מיט די געהעריגע שטייגער און נישט ווערן געשטערט פון דיקאנסטראקציע ארבעט איז די ארבעט צוטיילט און 5 באזונדערע פאזעס, און עס וועט געדוירן דורכאויס אלע זומער חדשים.