בס"ד

פרישע דראון בילדער צייגן ווי די NTSB גראבט אויס דעם קראך-ארט פונעם פליגער אין פלארידע וואו 9 זענען אומגעקומען

נייע דראון ווידעאו צייגט ווי די 'נעשאנעל טראנספארטעישאן סעיפטי בארד' (NTSB) גראבט אויס דעם ארט וואו דער 'לירדזשעט 60' פליגער האט אריינגעקראכט אין פאלם ביטש קאונטי, פלארידע, דעם פארגאנגענעם נאוועמבער 1, א טראגישער קראך אין וואס אלע ניין פאסאזשירן אויפ'ן פליגער זענען אומגעקומען.

דער פליגער איז ארויסגעפארן פון אסטין, טעקסאס, און איז געווען אויפ'ן וועג קיין נארט עלוטערא אין די באהאמאס, ווען עס האט פלוצלינג אראפגעקראכט אין א רעזידענשעל געגנט נעבן גרינעיקערס.

אין די ווידעאו קען מען זען דעם גרויסן קראטער בעפאר און דורכאויס די גראבונגען. נאכדעם וואס מען האט אויסגעפומפט דאס וואסער, קען מען זען ווי די ארבעטער זוכן דורך די ערד צו טרעפן איבערבליבענישן פונעם פליגער, און אין איין פונקט זעט מען ווי צוויי ארבעטער טראגן ארויס א גרעסערע שטיק.

די NTSB האט איבערגעגעבן אז די גראבונגען האבן זיך אנגעהויבן שפעט מיטוואך, נאוועמבער 4, און אינוועסטיגעיטארס האבן שוין באוויזן ארויסצושלעפן א טייל פון איין מאטאר.

טיילן פונעם פליגער זענען אויך געפונען געווארן ווייטער פונעם קראך-ארט, אריינגערעכנט אויף די דעכער פון ארומיגע הייזער און געביידעס. די אגענטור האט געבעטן די ארטיגע איינוואוינער צו באריכטן אויב זיי טרעפן עפעס. פריער אין די אויספארשונג האט מען געפונען א גרויסע טייל פונעם פליגער'ס לינקע 'עלעוועיטאר' צווישן 1.3 און 3.8 מייל אוועק פונעם קראך-ארט, וואס ברענגט ארויף ערנסטע פראגעס צי געוויסע טיילן פונעם פליגער זענען אראפגעפאלן נאך בעפארן קראך.

דערווייל האט די NTSB נאכנישט אנגעגעבן קיין אפיציעלע אורזאך פארן עקסידענט. די אויספארשער האבן אויך צוזאמגענומען דעשקעם ווידעאוס צו פרובירן צוזאמשטעלן די לעצטע מאמענטן פונעם פליגער. די הויפט פראגעס וואס בלייבן יעצט אפן זענען: וואס האט פאקטיש אראפגעברענגט דעם פליגער, וואס די געפונענע שטיקער וועלן אויפווייזן, און ווי לאנג עס וועט דויערן ביז מען וועט האבן קלארע ענטפערס.