די ניו יארק 'ניקס' האבן ענדליך באקומען זייערע לאנג-ערווארטעטע טשעמפיאנשיפ רינגען דינסטאג נאכט אין מעדיסאן סקווער גארדן, ביי א ספעציעלע צערעמאניע וואס איז פארגעקומען בעפאר זייער ערשטע געים פונעם נייעם סעזאן קעגן די פילאדעלפיע 76ers.

דאס איז די ערשטע מאל וואס די פראנטשייז געווינט דעם טיטל זינט יאר 1973, נאכדעם וואס די ניקס האבן באזיגט די 'סאן אנטאניא ספורס' אין פינף געימס ביי די ען-בי-עי פיינעלס.

די פראכטפולע רינגען, וועלכע זענען דיזיינט געווארן דורך 'דזשעיסאן אוו בעווערלי הילס', זענען געמאכט פון ווייסע גאלד און זענען באצירט מיט קנאפע 800 דיימאנטן און בלויע סאפיר שטיינער, וואס קומט אויס צו א סך-הכל פון 22 קעראט.

דער רינג איז אויסגעשטאט מיט אן אינטערעסאנטע חידוש: די אויבערשטע טייל קען מען אראפנעמען, און פון אונטן זעט מען א פונקטליכע נאכמאכונג פונעם דאך פונעם מעדיסאן סקווער גארדן. דערצו קען מען אויפדרייען דעם רינג אליינס, וואס אנטפלעקט א מיניאטורע מאדעל פונעם אינעווייניגסטן טייל פונעם סטאדיום. די צירונג-מאכער זאגן אז דאס איז די ערשטע מאל אין היסטאריע וואס א טשעמפיאנשיפ רינג ווערט געמאכט מיט אזא סארט דיזיין.

די רינגען זענען אויך פיל מיט באהאלטענע סימבאלן און מעסידזשעס. די ווערטער "ווארלד טשעמפיאנס" זענען באצירט מיט 69 דיימאנט פוינטס, ארויסצוברענגען די 69 געווינסן וואס דער טיעם האט געהאט אינאיינעם. א קליינע גאלדענע טראפי פארמאגט א 16-פוינט דיימאנט, וואס סימבאליזירט דעם 16-פוינט דעפיציט וואס די ניקס האבן באוויזן איבערצוקומען אין זייער לעצטע געים קעגן די ספורס. ווי אויך זענען די יוניפארם נומערן פון אלע שפילערס אריינגעקריצט ארום דעם רינג.

פענס וואס ווילן אן אנדענק פונעם היסטארישן מאמענט קענען קויפן נאכגעמאכטע ווערסיעס פונעם רינג דורך א ספעציעלע פראגראם, כאטש עס איז פארשטייט זיך נישט די זעלבע ווי די ארגינעלע רינגען פון די שפילערס.

אנליין האבן זיך געמאכט פארשידענע רעאקציעס. טייל האבן באוואונדערט די רייכקייט און טייערקייט פונעם רינג, בעת אנדערע האבן געמאכט שפאס פונעם אראפנעמבארן דאך וואס מאכט עס אויסזען ווי א שפילצייג, און האבן זיך געווערטלט אז די רינגען וועלן סוף-כל-סוף אנקומען אין די לאקאלע פאן-שאפס. אבער סיי ווי אזוי מען קוקט עס אן, איז דאס א רינג וואס די ניו יארקער פענס האבן געווארט א לאנגע 53 יאר צו קענען זען.