שרעקליכע באן עקסידענט אין דזשארדזשיע: א באן קראכט אריין אין א 18-ווילער טראק, דרייווער אנטלויפט פאר זיין לעבן
גאלערי
ווידעאס
דראמאטיש: א פראכט-צוג קראכט אריין אין א 18-רעדלדיגע טראק וואס איז שטעקן געבליבן אויף די באן שינעס אין דזשארדזשיע
א דראמאטישע עקסידענט האט זיך אפגעשפילט אין דעקעיטור, דזשארדזשיע, ווען א ריזיגע פראכט-צוג האט אריינגעקראכט אין אן 18-רעדלדיגע טראק וואס איז געבליבן שטעקן אויף די באן שינעס. דער גאנצער אינצידענט איז אויפגעכאפט געווארן אויף ווידעא דורך אן אנוועזנדער.
דער עדות, טרעשאן ראבערטס, וועלכער איז געזעסן אין זיין קאר ביי א טראפיק לייט, דערציילט אז ער האט באמערקט ווי דער טראק פלאגט זיך אראפצופארן פון די שינעס און דער מאטאר מאכט הויכע קולות. לויט ראבערטס, האט ער אנגעהויבן רעקארדירן נאכ'ן זען אז דער טראק רירט זיך נישט פון ארט, בעת מ'האט שוין געקענט הערן דעם פייף פון די אנקומענדיגע באן. דער טראק האט אנגעהויבן ארויסגעבן רויך, וואס האט נאר פארגרעסערט די פאניק ווי די באן קומט נענטער און נענטער.
בלויז עטליכע סעקונדעס בעפארן קראך, האט דער טראק דרייווער באוויזן ארויסצושפרינגען פונעם טראק און אנטלויפן אין א זיכערע ארט, קוים אויסמיידנדיג דעם אומגליק. באלד דערויף האט די פראכט-צוג אריינגעשמעטערט אינעם טראק מיט א געוואלדיגע קראפט, צושמעטערנדיג דעם גרויסן טראק אויף שטיקער, ווי מ'זעט קלאר אויף די ווידעא.
די שרעקעדיגע בילדער צייגן דעם קריטישן מאמענט ווען דער דרייווער האט איבערגעלאזט דעם טראק נאכן איינזען אז ער קען זיך נישט רירן. ברוך השם איז קיינער נישט פארוואונדעט געווארן אינעם אינצידענט. עס איז דערווייל נישט קלאר וואס האט פונקטליך פאסירט וואס האט געפירט דערצו אז דער טראק זאל בלייבן שטעקן אויף די שינעס.
דער עקסידענט דינט ווי א שרעקליכע דערמאנונג איבער די סכנה פון קארס אדער טראקס וואס בלייבן שטעקן אויף אקטיווע באן שינעס, וויבאלד א קומענדיגע באן ברויך האבן א גאר לאנגע שטרעקע זיך אינגאנצן אפצושטעלן.