בס"ד

ש"ס פירער אריה דרעי מעלדט א נייע איניציאטיוו: אומזיסטע תפילין און טלית פאר יעדע בר מצוה בחור אין ארץ ישראל

דער פירער פון די ש"ס פארטיי, אריה דרעי, האט דאנערשטאג געמאלדן א נייע פלאן מיטן ציל צו פארשטארקן אידישקייט, וואו ער האט זיך אונטערגענומען צוצושטעלן אומזיסטע תפילין און א טלית פאר יעדע אידישע קינד אין ארץ ישראל וואס גרייכט די בר מצוה יארגאנג.

די נייע פראגראם, וואס ווערט אנגערופן "תפילין פאר יעדעס קינד", וועט צושטעלן א ספעציעלע בר מצוה פעקעדזש פאר יעדע דרייצן יעריגע בחור דורך די עדיוקעישאן סיסטעם, אומאפהענגיג פון די פינאנציעלע מצב פון זיין פאמיליע. דרעי האט פרעזענטירט דעם פלאן אלס טייל פון די צוזאגן וואס די ש"ס פארטיי גיט ארויס בעפאר די קומענדיגע עלעקשאנס, זאגנדיג אז די פארטיי וועט ארבעטן עס צו פארווירקליכן אין די קומענדיגע רעגירונג.

אין צוגאב צום טיילן תפילין און טליתים, פלאנט ש"ס פאראויסצורוקן א געזעץ וואס וועט פאדערן פון אלע שולעס צוצושטעלן א ספעציעלע פלאץ וואו סטודענטן וואס ווילן לייגן תפילין און דאווענען זאלן דאס קענען טון אומגעשטערט דורכאויס דעם שולע טאג.

דער פארשלאג קומט אין ליכט פון די לעצטערע פובליק דעבאטעס איבער אידישקייט אין די אלגעמיינע שולעס אין לאנד, און אלס אן ענטפער צו פארשידענע פאליטישע פיגורן וואס האבן לעצטנס גערופן צו פארמינערן רעליגיע אין די פובליק לעבן. דרעי האט ארויסגעברענגט אז די ציל פונעם איניציאטיוו איז צו פארשטארקן די קשר צווישן די אידישע יוגנט און זייער רעליגיעזע אפשטאם. ער האט אונטערגעשטראכן די חשיבות פון די מצוה פון תפילין אלס אן אלט-געזעסענע סימבאל פון אידישע אידענטיטעט און א וויכטיגע אויסדרוק פון כלל ישראל'ס פארבינדונג צו די תורה און מסורה.

דערווייל איז נאכנישט ארויסגעגעבן געווארן קיין פונקטליכע דעטאלן איבער ווי אזוי די פראגראם וועט ווערן פינאנצירט און אדמיניסטרירט. די איניציאטיוו בלייבט דערווייל בלויז א פאליטישע צוזאג און איז נאכנישט אריין אין קראפט אלס געזעץ אדער איינגעשטעלט געווארן למעשה דורך די עדיוקעישאן סיסטעם.