די פלעטבושער אידישע קאמיוניטי קאאליציע (FJCC) האט דינסטאג אינדערפרי אפגעהאלטן א וויכטיגע מיטינג מיט ברוס בלעיקמאן, דער נאסאו קאונטי עקזעקיוטיוו און א רעפובליקאנער קאנדידאט פאר די קומענדיגע 2026 ניו יארק גאווערנאר וואלן. די פארזאמלונג איז פארגעקומען אין ביהמ"ד קהל בני אברהם יעקב אויף עוועניו N.

ביי די אסיפה האבן זיך באטייליגט לאקאלע עסקנים, קאמיוניטי פירער און פארשידענע פארטרעטער פונעם ציבור, וועלכע זענען זיך צוזאמגעקומען פאר א געמיינזאמע שמועס מיט בלעיקמאן אין ליכט פון די בעפארשטייענדע וואלן.

בלעיקמאן, וועלכער איז אריין אין היסטאריע אלס דער ערשטער אידישער קאונטי עקזעקיוטיוו אין נאסאו קאונטי נאכן געווינען די וואלן אין 2021, האט זינט זיין אריינקומען אין אפיס אויפגעבויט גאר נאענטע און ווארימע באציאונגען מיט די היימישע קהילות איבער די גאנצע ניו יארקער ראיאן.

די FJCC ארגאניזאציע האט א לאנגע היסטאריע פון ארגאניזירן ענליכע פארומס און מיטינגען מיט ערוויילטע אפישעלס און פאליטישע קאנדידאטן פון אלע שטאפלען אין די רעגירונג. מיט די דאזיגע באגעגענישן דינען זיי אלס א וויכטיגע בריק און קאמיוניקאציע-קאנאל צווישן די ארטאדאקסישע קהילה אין פלעטבוש און די פאליטישע פירערשאפט אין ניו יארק.