בס"ד

שטורעם אין מדינת ישראל: אפאזיציע פירער יאיר גולן ציט צוריק נאכן ווערן רעקארדירט אז ער איז גרייט צו זיצן אין א קאאליציע מיט די חרדים

א רעקארדירונג פונעם מדינת ישראל אפאזיציע פאליטיקאנט יאיר גולן האט ארויסגערופן א שטורעם ענדע מאי, נאכדעם וואס ער האט אנגעדייט אז ער וואלט געווען גרייט צו שטיצן א רעגירונג וואס נעמט אריין די חרדי'שע פארטייען, אבער האט פובליק צוריקגעצויגן פון זיין פאזיציע קורץ נאכדעם וואס די רעקארדירונג איז ארויסגעשטעלט געווארן.

די רעקארדירונג, וואס איז געווארן אויפגעשפילט דורך קאנאל 14 דעם 26'סטן מאי, צייגט ווי גולן, וועלכער דינט אלס פארזיצער פון די 'דעמאקראטן' פארטיי, רעדט מיט פארטיי אקטיוויסטן איבער די מעגליכקייט פון צוזאמשטעלן א רעגירונג אן דעם יעצטיגן פרעמיער מיניסטער בנימין נתניהו און זיינע פאליטישע אליאירטע.

דורכאויס דעם שמועס האט גולן געזאגט אז ער וועט נישט אטאמאטיש אויסשליסן א קאאליציע מיט די חרדי'שע פארטייען אויב זייער אנטיילנעמונג איז וויכטיג צו קענען אויפשטעלן אן אלטערנאטיווע רעגירונג. ער האט קלארגעשטעלט אז ער וואלט געשטיצט אזא פלאן, בתנאי אז נתניהו'ס ליכוד פארטיי און די רעכטע פארטייען אנגעפירט דורך בצלאל סמוטריטש און איתמר בן גביר זענען אינדרויסן.

אין די רעקארדירונג הערט מען אויך ווי גולן רעדט ארום איבער די סענסיטיווע נושא פון גיוס בני ישיבות, וואו ער קריטיקירט די פאליטישע פארשלאגן וואס פארלאנגען אז מען זאל גלייך ארייננעמען גרויסע מאסן חרדים אין מיליטער. ער האט עס אראפגעלייגט אלס א קאמפליצירטע פראצעס, און טענה'ט אז כדי צו מאכן אן עכטע טויש פעלט זיך אויס א פאוואליעדיגע צוגאנג און נישט קיין איבערגעאיילטע שריט.

אבער, באלד נאכדעם וואס די רעקארדירונג איז געווארן פובליצירט, האט גולן ארויסגעגעבן א פובליק קלעריפיקאציע דעם 27'סטן מאי, באשולדיגנדיג קאנאל 14 אין ארויסרייסן זיינע ווערטער פון קאנטעקסט. ער האט דערנאך דעקלארירט אז די חרדי'שע פארטייען וועלן בשום אופן נישט זיין קיין טייל פון א צוקונפטיגע רעגירונג אנגעפירט דורך זיין פאליטישע לאגער, טענה'נדיג אז זייערע פאזיציעס איבער די מיליטער און אנדערע אישוס מאכן זיי פאר אומאקצעפטירבארע קאאליציע שותפים.

די קעגנזייטיגע סטעיטמענטס האבן געברענגט פרישע קריטיק און באנייט די דעבאטע איבער ווי ווייט די אפאזיציע פירער זענען באמת גרייט צו ארבעטן אינאיינעם מיט די חרדי'שע פארשטייער, טראץ די טיפע דיפערענצן איבער רעליגיעזע און מיליטערישע פאליסיס. די רעקארדירונג האט אויך ארויסגעברענגט די ברייטערע רייסענישן אינערהאלב די אפאזיציע, צי מען זאל בכלל באטראכטן א קאאליציע מיט די חרדים אין די צוקונפטיגע פארהאנדלונגען.

הגם די רעקארדירונג איז ארומגעפארן ענדע מאי, איז די פונקטליכע דאטום ווען גולן האט ארגינעל געזאגט די ווערטער נישט קלארגעשטעלט געווארן אין די באריכטן.