רוסלאנד הייבט אן מאסן-פראדוקציע פון נייע סיסטעם צו האקן און שטערן 'סטארלינק' סעטעלייטס אין אוקראינע

לויט באריכטן האט רוסלאנד אנגעהויבן א פולע מאסן-פראדוקציע פון איר נייע עלעקטראנישע וואפן-סיסטעם, באקאנט אלס "וואלנא קופאל גאראנט" (Volna Kupol Garant). דאס צייגט אן ערנסטע עסקעלאציע אין רוסלאנד'ס פרואוון צו שטערן די 'סטארלינק' סעטעלייט נעצווערק, וואס איז געווארן א הויפט טייל פון די אוקראינישע מיליטערישע אפעראציעס.

אנדערש ווי טראדיציאנעלע 'דזשעמינג' עקוויפמענט וואס צילט די טערמינאלן אויף דער ערד, ארבעט די נייע סיסטעם אינגאנצן אנדערש. עס שיקט גאר מעכטיגע ראדיא סיגנאלן דירעקט ארויף צו די סטארלינק סעטעלייטס אין הימל. רוסישע באאמטע זאגן אז דער ציל איז צו איבערפילן די סעטעלייט אנטענעס און זיי צייטווייליג "בלינד" מאכן, אזוי אז זיי זאלן נישט קענען אויפכאפן קיין סיגנאלן פון די אוקראינישע טערמינאלן. רוסישע קוועלעס געבן איבער אז די סיסטעם איז שוין דורכגעגאנגען עטליכע פראבעס און איז יעצט גרייט פאר ברייטע פראדוקציע.

די טעכנאלאגיע קען האבן א גרויסע עפעקט אויפן שלאכטפעלד אין אוקראינע, וואו סטארלינק איז געווארן א וויכטיגע געצייג פאר די אוקראינישע קרעפטן. אוקראינע נוצט סטארלינק פאר זייערע דראונס, צו טרעפן רוסישע פאזיציעס, נאכפאלגן קאנוואויס, און קאארדינירן אטאקעס טיף אינעם פיינט'ס טעריטאריע. דורך שטערן די קאנעקשאן, האפט רוסלאנד שווערער צו מאכן פאר די אוקראינישע זעלנער צו זען, קאמיוניקירן און אטאקירן מיט די זעלבע פונקטליכקייט ווי ביז יעצט.

פון די אנדערע זייט, זענען די אוקראינישע קרעפטן נישט שולדיג געבליבן. זיי האבן שוין באוויזן אויפצוזוכן און חרוב מאכן עטליכע פון די נייע רוסישע דזשעמינג סיסטעמען. וויבאלד די סיסטעמען געבן ארויס א שטארקע עלעקטראנישע סיגנאל, קענען די אוקראינישע דראונס עס גרינג אויפכאפן און צילן.

עקספערטן שאצן אז די טעכנאלאגיע קען זיך אויך אריבערכאפן ווייטער פונעם אוקראינישן פראנט. אין איראן האט די רעגירונג לעצטנס קאנפיסקירט הונדערטער סטארלינק טערמינאלן וואס מענטשן האבן גענוצט צו באקומען אינטערנעט אומלעגאל און ארומגיין די צענזור פון די רעגירונג. נעמענדיג אין אכט די נאענטע מיליטערישע קאאפעראציע צווישן רוסלאנד און איראן, און באריכטן אז מאסקווע האט שוין אין דער פארגאנגענהייט געטיילט ענליכע טעכנאלאגיע מיט טעהראן, גלייבט מען אז איראן וועט עווענטועל פרובירן צו באקומען די "וואלנא קופאל גאראנט" סיסטעמען. דאס וועט געבן פאר די איראנער רעגירונג א פרישע געצייג צו בלאקירן סטארלינק און קאנטראלירן די אינטערנעט צוטריט אין לאנד.

טראץ די גרויסע פלענער, האט די סיסטעם אבער עטליכע ערנסטע חסרונות. יעדע מאשין קען נאר דעקן א קליינע שטח, און קען בלויז דזשעמען איין סטארלינק סעטעלייט אויף אמאל. דאס איז א גרויסע פראבלעם, וויבאלד סטארלינק פארמאגט טויזנטער סעטעלייטס וואס פליען כסדר אריבער. דערצו איז די סיסטעם זייער טייער צו פראדוצירן, און ווי פריער דערמאנט, מאכט איר גרויסקייט און שטארקע סיגנאלן עס גרינג פאר אוקראינע צו אטאקירן.

פונדעסטוועגן, צייגט די באשלוס פון רוסלאנד צו גיין אין א פולע מאסן-פראדוקציע אז זיי זענען גרייט צו אינוועסטירן דערין אויף א לאנגן טערמין, האפנדיג אז די בענעפיטן וועלן זיך לוינען אין די ווייטערדיגע טעכנאלאגישע קריגערייען אין די הימלען העכער אוקראינע.