קאנטראווערסיאלער יוטובער טיילער אליוועירא צוריק אין די היימישע געגנטער; עסקנים ווארענען דעם ציבור זיך נישט צו טענה'ן מיט אים

דער קאנטראווערסיאלער יוטובער טיילער אליוועירא איז צוריקגעקומען צו די היימישע געגנטער אין ניו יארק און ניו זשערסי, עטלעכע חדשים נאכדעם וואס זיינע פריערדיגע העצעריי ווידעאוס איבער קרית יואל און לעיקוואוד האבן געצויגן מיליאנען קוקערס און א שטורעם פון פארדאמונגען איבער זיין אנטיסעמיטישע אראפלייגונג פון חרדי'שע אידן.

מיטוואך, אוגוסט 26, האט אליוועירא ארויפגעשטעלט א קורצע ווידעאו אויף אינסטאגראם מיט די קעפשען "איך בין היינט ארומגענומען געווארן דורך חסידישע אידן," וואו מען זעט אים ארומגערינגלט מיט א גרופע חסידים. די פאוסט האט שוין באקומען צענדליגע טויזנטער 'לייקס' ווי נאר עס האט אנגעהויבן צירקולירן אויף די סאשעל מידיא פלאטפארמעס.

דער קליפ זעט אויס צו זיין א טייל פון א פרישע רייזע וואס ער מאכט יעצט איבער עטלעכע גרויסע היימישע קהילות. לויט באריכטן, איז אליוועירא געזען געווארן דינסטאג אין די אידישע געגנטער אין ברוקלין, און מיטוואך איז ער אנגעקומען קיין לעיקוואוד, ניו זשערסי, באגלייט מיט א פילמירונג שטאב, וואו ער האט פרובירט אפצושטעלן איינוואוינער אויפן גאס און אריינגיין אין לאקאלע מוסדות. שפעטער איז ער אויך געזען געווארן אין שיכון סקווירא אין ראקלאנד קאונטי.

ווי נאר די נייעס איבער זיין אנוועזנהייט האט זיך פארשפרייט, האבן לאקאלע נייעס קוועלער און עסקנים גערופן דעם ציבור זיך נישט צו וויסנדיג מאכן פון אים. 'לעיקוואוד אלערטס' האט געווארנט די איינוואוינער פשוט אוועקצוגיין און זיך נישט אריינלאזן אין קיין שום וויכוחים אדער אינטערוויוס מיט אים. זיי האבן אויך געראטן צו רופן די פאליציי אויב ער קומט אריין אויף פריוואטע פראפערטי אדער זאגט זיך אפ צו פארלאזן דעם ארט. ענליכע אנווייזונגען זענען ארומגעשיקט געווארן ווען ער איז באריכטעט געווארן אין סקווירא. הגם די קלאנגען אז ער האט "געטשעפעט" מוסדות זענען דערווייל נישט זעלבסטשטענדיג באשטעטיגט געווארן.

די יעצטיגע באזוכן קומען נאכדעם וואס אליוועירא האט ארויסגעגעבן א רייע וויירעל ווידעאוס אנהייב יאר וואס זענען געווען געצילט קעגן היימישע און ארטאדאקסישע קהילות.

אין יאנואר האט ער פובליצירט א ווידעאו איבער קרית יואל מיט אן אנטיסעמיטישן קעפל וואס רעדט איבער א שטאט "אינוואדירט דורך וועלפער-אדיקטירטע אידן", וואו ער האט אראפגעמאלן די סאטמארע קהילה מיט בלבולים איבער גאווערנמענט פראגראמען און פאליטישע איינפלוס. די 'עי-די-על' (ADL) האט דעמאלטס קלארגעשטעלט אז די ווידעאו נוצט אלטע אנטיסעמיטישע סטעריאטיפן.

אין פעברואר האט ער נאכגעפאלגט מיט א ווידעאו איבער לעיקוואוד מיטן קעפל "איך האב אויפגעדעקט ניו זשערסי'ס אידישע אינוואזיע". לויט באריכטן האט ער דארט גענוצט אויסגעקליבענע אינטערוויוס און א פאלשע בילד צו אראפרייסן דעם חרדי'שן ציבור ווי קארופטירט און אנגעוויזן אויף פובליק פאנדן. ביידע ווידעאוס האבן באקומען מיליאנען קוקערס און האבן ארויסגערופן א שארפע רעאקציע פון אידישע פירער און עסקנים.

די קאנטראווערסיע ארום אים האט זיך נאך מער אנגעהיצט אין מאי, ווען אליוועירא האט פרובירט צו פארן קיין ארץ ישראל און מען האט אים נישט אריינגעלאזט ביים בן גוריון עירפארט. דער מיניסטער פאר תפוצות אמיחי שיקלי האט דעמאלטס באשטעטיגט אז ער האט זיך אריינגעמישט אינעם באשלוס, זאגנדיג אז אליוועירא'ס אקטיוויטעטן אויפן אינטערנעט זענען פיל ערגער ווי סתם קריטיק, און ער האט אים באשולדיגט אין נוצן העצערייען קעגן אידן בלויז צו באקומען אויפמערקזאמקייט אויף סאשעל מידיא. אליוועירא איז דעמאלטס גלייך דעפארטירט געווארן צוריק קיין אמעריקע.

אליוועירא פון זיין זייט לייקנט אפ די באשולדיגונגען קעגן אים, און האט זיך פובליק אפגערעדט אז מען האט אים פארבאטן אריינצוקומען צוליב וואס ער רופט "אנטיסעמיטישע" קאנטענט.

זיין יעצטיגע צוריקקער קיין ברוקלין, לעיקוואוד און סקווירא צייגט אז פרישע ווידעאוס וואס צילן די היימישע קהילות זענען יעצט אין פראדוקציע. דערווייל איז די קורצע קליפ וואס ער האט ארויסגעשטעלט מיטוואך די איינציגסטע מאטעריאל וואס ער האט פובליצירט פון זיין יעצטיגע רייזע.