שוידערליך: 19-יעריגער ארבעטער טויטליך צוריסן געווארן דורך א טיגער ביי א 'טיק-טאק' רעקארדירונג

א 19-יעריגער פארם ארבעטער מיטן נאמען טאלהא איז טראגיש אומגעקומען נאכן ווערן טויטליך צוריסן דורך א טיגער, בעת מ'האט רעקארדירט א ווידעאו פאר 'טיק-טאק' אויף א פריוואטע פארם אין קאהנא, לאהאר, דעם פארגאנגענעם נאוועמבער 11.

דער אינצידענט האט פאסירט ווען א באקאנטער סאשעל-מידיא 'אינפלוענסער', נאוועמאן כאסאן, וועלכער איז באקאנט מיט זיינע געפארפולע שטיקעס מיט ווילדע חיות, איז געקומען צום פארם צו כאפן א ווידעאו. לויט באריכטן, האט מען ארויסגענומען דעם טיגער פון איר שטייג אויף זיין פארלאנג. די ווילדע חיה האט זיך ארויפגעווארפן אויף דעם יונגן ארבעטער, איבערלאזנדיג אים מיט טיפע וואונדן אין זיין האלדז און רוקן. ער איז אפגעפירט געווארן אין א פריוואטן האספיטאל וואו ער איז ליידער אויסגעגאנגען פון זיינע וואונדן.

די לאהאר פאליציי האט ארעסטירט דעם אינפלוענסער כאסאן און דעם אייגנטומער פונעם פארם, פאיאז, בעת די אויספארשונג גייט אן.

די אויספארשער קוקן יעצט אריין אין מעגליכע נאכלעסיגקייט, צו מ'האט געהאט די ריכטיגע פערמיטן, און צו מ'האט איגנארירט זיכערהייט רעגולאציעס. די פאליציי פארשט אויך אויס א פארדאכט אז מ'האט פרובירט צו פארדעקן דעם אמת, נאכדעם וואס מ'האט ארגינעל געזאגט פארן האספיטאל אז טאלהא איז בלויז געביסן געווארן דורך א הונט. אבער א רעקארדירטע שמועס צווישן דעם פארם אייגנטומער און טאלהא'ס פאטער האט אנטפלעקט דעם אמת אז דער אטאקירער איז באמת געווען דער טיגער.

א ווארטזאגער פאר די לאהאר פאליציי האט שארף רעאגירט צום אינצידענט זאגנדיג: "א תאוה פאר א טיק-טאק ווידעאו קען נישט זיין וויכטיגער פון א מענטשליכע לעבן." א פריערדיגע ווידעאו צייגט טאקע ווי כאסאן שפילט זיך מיט דעם זעלבן באקייטלטן טיגער אויפן פארם, וואס צייגט אויף די געפארפולע קאנטענט וואס ער פירט זיך צו פאוסטן אנליין.

די מענער זענען דערווייל בלויז ארעסטירט און נאכנישט פאראורטיילט געווארן, און די פולע דעטאלן פונעם קעיס וועלן דארפן קלאר ווערן אין געריכט.