פתח תקוה — דינסטאג אינדערפרי האבן וואלאנטירן פון די 'ידידים' ארגאניזאציע אין ארץ ישראל מיט הצלחה ארויסגעראטעוועט א קליין צוויי יעריג מיידעלע וואס איז בטעות פארשפארט געווארן אין א קאר, דירעקט פאר די אויגן פון איר טאטע אין שטאט פתח תקוה.

דער עמערדזשענסי רוף איז אריינגעקומען צום דיספעטש צענטער ארום 9:28 אינדערפרי פון בן-גוריון סטריט אין שטאט. דער דיספעטשער מתן סימנוק האט אויפגענומען דעם רוף און תיכף אלארמירט די וואלאנטירן אין די געגנט.

צווישן די וואס זענען געלאפן צו די סצענע זענען געווען דער הויפט פון 'ידידים' ישראל אלמסי, זיין דעפיוטי לייזי שטערן, אינאיינעם מיט די וואלאנטירן אוהד גיבלי און אסף סאלאמאן. באוואפנט מיט ספעציעלע געצייג, האבן די וואלאנטירן אין א קורצע צייט אויפגעבראכן די קאר און ארויסגענומען דאס קינד געזונט און שטארק, אן אנצומאכן סיי וואספארא שאדן צום פארמיטל.

לייזי שטערן האט איבערגעגעבן אז פיר וואלאנטירן זענען אנגעקומען אויפ'ן ארט גלייך נאכ'ן רוף, און עס האט זיי גענומען בלויז עטליכע סעקונדעס צו באפרייען דאס קינד. ער האט צוגעגעבן אז דער דערשראקענער טאטע האט אפגעאטעמט מיט גרויס רעליף און זיך כסדר באדאנקט פאר די וואלאנטירן נאכ'ן סוקסעספולן רעטונגס אפעראציע.

אין ליכט פונעם פאסירונג, האט די 'ידידים' ארגאניזאציע איבערגעחזר'ט זייער שטרענגע ווארענונג פאר עלטערן צו אלץ האלטן די קאר שליסלען ביי זיך ווען מען טרעט ארויס פונעם קאר, אפילו אויב עס איז נאר פאר א קורצע מינוט, וויבאלד די צענטראלע שלאס סיסטעם פונעם קאר קען זיך אטאמאטיש פארשפארן און איבערלאזן א קינד פארכאפט אינעווייניג.