עגיפטישער פרעזידענט א-סיסי מעלדט: איך וועל אפטרעטן פון מאכט אין יאר 2030

דער 71-יעריגער עגיפטישער פרעזידענט, אבדעל פאטאח א-סיסי, האט דעם פארגאנגענעם שבת, אקטאבער 17, געמאלדן אז זיין טערמין אלס פרעזידענט וועט זיך ענדיגן אין יאר 2030, און ער פלאנט נישט צו לויפן פאר נאך א טערמין.

ביי א רעדע צו גראדואירטע סטודענטן און באאמטע אין די עגיפטישע מיליטערישע אקאדעמיע אינעם נייעם 'אדמיניסטראטיוון הויפטשטאט', האט א-סיסי קלארגעשטעלט אז דער באשלוס איז "גענצליך פארזיגלט" און עס איז נישט דא וואס צו רעדן דערוועגן. ער האט צוגעגעבן דעם תנאי "אויב דער אויבערשטער וועט מיר שענקען לעבן", און איבערגעחזר'ט אז מען וועט זיך נישט אנרירן אין די קאנסטיטוציע צו טוישן די געזעצן לטובת אים.

זיינע ווערטער קומען אלס א דירעקטע אפענטפער צו קלאנגען וואס זענען לעצטנס ארומגעפארן אויף סאשעל מידיא, אז די רעגירונג פלאנט צו מאכן טוישונגען אין די קאנסטיטוציע אין יאר 2027 אים צו ערלויבן צו לויפן פאר נאך א טערמין. ווי אויך האט ער אפגעווארפן די שמועות אז ער גרייט אן א נאנטן פאמיליע מיטגליד אים איבערצונעמען.

א-סיסי פירט דאס לאנד שוין זינט 2014, און איז איבערגעוויילט געווארן דעם פארגאנגענעם דעצעמבער 2023 פאר א פרישן זעקס-יעריגן טערמין. לויט א קאנסטיטוציאנאלע טויש וואס איז דורכגעפירט געווארן אין א רעפערענדום אין 2019, זענען פרעזידענטליכע טערמינען פארלענגערט געווארן פון פיר יאר צו זעקס יאר, אבער עס האט אנגעהאלטן דעם געזעץ אז א פרעזידענט קען בלויז דינען צוויי טערמינען. כדי ער זאל קענען בלייבן אין אפיס נאך 2030, וואלט זיך אויסגעפעלט א פרישע טויש אין די קאנסטיטוציע.

נייער פלאן פאר צוקונפטיגע פירערשאפט

אין די זעלבע צייט האט דער פרעזידענט אויפגעדעקט א נייעם פלאן צו טרענירן דעם קומענדיגן דור פון פירער אין עגיפטן. לויטן פלאן, וועלן פערזאנען וועלכע פארמאגן א דאקטאר דיפלאם (PhD) פון אנערקענטע אוניווערסיטעטן, סיי אין עגיפטן און סיי אין אויסלאנד, דורכגיין א 30-מאנאטליכע טרענירונג אין די מיליטערישע אקאדעמיע, וואו זיי וועלן שטודירן די ווירטשאפט פונעם לאנד און אירע רעסורסן.

די וואס וועלן גראדואירן פון דעם פראגראם וועלן זיין צוגעגרייט צו איבערנעמען הויכע פאזיציעס, אריינגערעכנט דעם פרעזידענטשאפט, מיניסטארן, גאווערנארס און פארלאמענט מיטגלידער. א-סיסי האט צוגעגעבן אז די עגיפטישע בירגער וועלן קענען "וויילן און קלייבן" פון צווישן די דאזיגע קאנדידאטן, כאטש ער האט נישט ארויסגעגעבן קיין פונקטליכע דעטאלן ווי אזוי די קאנדידאטן וועלן ארויסגעשטעלט ווערן. א ספעציעלע קאמיטע, אנגעפירט דורכן ספיקער פונעם פארלאמענט און צוזאמענגעשטעלט פון פאליטיקאנטן, אינטעלעקטואלן און די מיניסטארן פון יוסטיץ און העכערע בילדונג, וועט אוועקשטעלן די פונקטליכע קריטעריעס און אויסארבעטן די געזעצן דערפאר.

דער פרעזידענט האט אונטערגעשטראכן אז ער מעלדט דעם פלאן מער ווי 40 חדשים בעפאר זיין טערמין לויפט אפ, כדי אויסצומיידן שמועות און פאליטישע רייבערייען איבער די צוקונפטיגע פירערשאפט.

פון די אנדערע זייט, ווייזן אנאליסטן אן אז דער נייער פלאן שטעלט דאס מיליטער אינעם צענטער פון די פירערשאפט-טראנזיציע נאך יאר 2030. דאס קומט אין א צייט וואס מענטשנרעכט גרופעס באשולדיגן שוין לאנג די עגיפטישע רעגירונג אין אונטערדרוקן פאליטישע אפאזיציע, ציווילע געזעלשאפטן און באגרעניצן די פרייהייט פון ווארט.