אינטערעסאנטע טיימינג: אמעריקאנער עיר פארס פראבירט אויס אן אומבאוואפנטע מיסיל פונקט ווען די APEC סאמיט הייבט זיך אן
גאלערי
ווידעאס
אמעריקע פירט דורך א נוקלעארע מיסיל טעסט פונקט בעפאר די היסטארישע טראמפ-פוטין-שי סאמיט אין כינע
די אמעריקאנער עיר פארס האט דורכגעפירט א סוקסעספולע פראבע אויף אן אומבאוואפנטע 'מיניטמען 3' אינטערקאנטינענטאלע באליסטישע מיסיל, וואס איז אומשטאנד צו טראגן נוקלעארע וואפנס. די מיסיל איז ארויסגעשאסן געווארן פונעם וואנדענבערג ספעיס פארס בעיס אין קאליפארניע, און די טיימינג פונעם טעסט האט אויפגעוועקט א שטורעם אין די וועלטליכע נייעס.
די פראבע, וואס האט באקומען דעם נאמען "גלארי טריפ 257", איז געווען געסקעדזשולד זיך צו הייבן אין א צייט-אפשניט צווישן נאוועמבער 17, 11:01 ביינאכט (פאסיפיק צייט) און נאוועמבער 18, 5:01 פארטאגס. באריכטן געבן אן אז די מיסיל איז ארויסגעשאסן געווארן קורץ נאך 11 ביינאכט, פונקט אין די זעלבע צייט וואס די גרויסע APEC סאמיט האט זיך געעפנט אין שענזשען, כינע.
די 'עיר פארס גלאבאלע סטרייק קאמאנד' האט קלארגעשטעלט אז דער טעסט איז שוין געווען פלאנירט יארן פריער, מיטן ציל צו באשטעטיגן די פארלעסליכקייט פונעם צענדליגער יארן-אלטן סיסטעם, און עס איז נישט קיין רעאקציע צו סיי וועלכע אינטערנאציאנאלע געשעענישן.
אבער די אויגן פון די גאנצע וועלט זענען געוואנדן קיין שענזשען צוליב די פראמינענטע פירער וואס געפינען זיך דארט. פרעזידענט טראמפ, דער כינעזער פרעזידענט שי דזשינפינג, און דער רוסישער פרעזידענט וולאדימיר פוטין זענען ערווארטעט אפצוהאלטן זייער ערשטע היסטארישע דריי-זייטיגע מיטינג דעם דאנערשטאג, נאוועמבער 19, אין די זייט פונעם סאמיט. אויפ'ן אגענדע וועט זיין נוקלעארע וואפנס קאנטראל, די איראנער מלחמה, און די סיטואציע אין אוקריינע.
דאס ווייסע הויז האט לויט באריכטן סיגנאליזירט אז מען ערווארט נישט קיין שום אפיציעלע אפמאך פונעם מיטינג. כאטש קיין איין אמעריקאנער באאמטער האט נישט געזאגט אז די מיסיל טעסט איז געצילט אלס א מעסעדזש פאר ביידזשינג אדער מאסקווע, און יעדע אזא טייטש איז בלויז שפעקולאציעס, לאזט עס אבער איבער א גרויסע פראגע צייכן אין די לופטן: איז דאס טאקע בלויז א רוטינע סקעדזשול, אדער א גוט-געצילטע דערמאנונג איבער אמעריקע'ס מאכט פונקט בעפאר די פירער זעצן זיך צום טיש?