טראגיש: 15-יעריגע מיידל אומגעקומען און איר פריינדין פארוואונדעט נאכן ווערן אראפגעקלאפט דורך א טראק אין מאנהעטן

א פרייטאג צונאכטס רייזע אויף א 'סיטי בייק' אין די איסט ווילעדזש געגנט אין מאנהעטן האט זיך געענדיגט טראגיש, ווען א קאמערציאלע טראק האט אראפגעקלאפט צוויי טינעידזשער מיידלעך וועלכע זענען געפארן אינאיינעם אויף איין בייק. די 15-יעריגע דאריא סערקאוו איז אומגעקומען, און איר 16-יעריגע פריינדין געפינט זיך אין שפיטאל מיט וואונדן.

דער שרעקליכער עקסידענט האט פאסירט ארום 9 אזייגער ביינאכט ביים אינטערסעקשאן פון איסט 14'טע סטריט און ערשטע עוועניו. א 57-יעריגער דרייווער פון א גרויסע 'פיטערבילט' טראק, וואס באלאנגט פאר די 'בעדזשער דעלייטינג' קאמפאני, האט זיך געדרייט רעכטס אויף די ערשטע עוועניו בשעת'ן פארן אויף די וועסט זייט, און האט אריינגעקראכט אינעם בייק וואס האט פראבירט צו מאכן דעם זעלבן דריי. די 16-יעריגע האט געטריבן דעם בייק בשעת די 15-יעריגע סערקאוו איז געזעצן אונטער איר אלס פאסאזשיר.

ביידע זענען טראנספארטירט געווארן אין אן איילעניש צום 'בעלוויו' שפיטאל, וואו דאקטוירים האבן ליידער באשטעטיגט דעם טויט פון סערקאוו. די צווייטע מיידל ווערט באהאנדלט פאר וואונדן אין איר פוס און געפינט זיך ברוך השם אין א סטאבילע צושטאנד. בילדער פונעם סצענע האבן געוויזן דעם צוקוועטשטן 'סיטי בייק' אונטער די רעדער פונעם טראק. דער דרייווער, וועלכער איז נישט געשעדיגט געווארן, איז פארבליבן אויפן ארט, און די פאליציי האט דערווייל קיינעם נישט ארעסטירט.

די עקסידענט אויספארשונג אפטיילונג פון די ניו יארקער פאליציי (NYPD) פארשט אויס די אומשטענדן פונעם קראך. די ניו דזשערזי באזירטע קאמפאני וואס דער טראק באלאנגט צו איר, האט ארויסגעגעבן א סטעיטמענט אז זיי זענען טיף צושאקלט און האבן אויסגעדרוקט מיטגעפיל פאר די פאמיליע.

די טראגעדיע האט פריש אויפגעוועקט זארג איבער די זיכערהייט פון דעם אינטערסעקשאן. טראנספארטאציע אקטיוויסטן האבן אנגעוויזן אז דאס איז שוין דער פערטער בייק-פארער וואס ווערט געהרגעט אויף דעם אכט-בלאק שטרעקע פון די ערשטע עוועניו אין די לעצטע צען יאר. זיי פאדערן פון די שטאט צו אינסטאלירן בעסערע זיכערהייט מיטלען און באשיצטע בייק-לעינס צו פארמיידן ענליכע טראגעדיעס אין די צוקונפט. דערווייל בלייבט דער ווינקל א פיינפולע דערמאנונג פון די סכנות וואס פוסגייער און בייק-פארער גייען דורך ביי די פארנומענע מאנהעטן גאסן.