בס"ד

אומגלויבליכע טורמע אנטלויף: ארעסטאנט נוצט א פשוט'ן בלייער אויפצוברעכן זיין צעל

אן ארעסטאנט אין סאוט קאראליינע האט באוויזן דורכצופירן א טורמע-אנטלויף וואס איז אזוי פשוט אז עס הערט זיך ווי אן אויסגעטראכטע מעשה, און דאס גאנצע איז פאראייביגט געווארן אויף די זיכערהייט קעמערעס.

די סורוועילענס ווידעא פונעם 'טשעסטערפילד קאונטי' דעטענשאן צענטער צייגט ווי דער 30-יעריגער טשארלס אלעקסאנדער דיטעריטש הייבט אונטער די טיר פון זיין צעל פונקט גענוג אריינצושטעקן א בלייער (פענסיל) אינעם שלאס מעכאניזם, און אזוי ארום האט ער עס אויפגעקראכט דעם 1'טן סעפטעמבער. פון דארט האט ער שפאצירט רואיגערהייט דורך די קאך פונעם דזשעיל און זיך ארויסגעגליטשט דורך אן אפענע טיר וואס ווערט געווענליך גענוצט דורך די קאך ארבייטער ארויסצוטראגן די מיסט. דערנאך האט ער איבערגעקראכן א צוים באדעקט מיט שטעכיגע דראטן (בארב-ווייער) און זיך אינגאנצן באפרייט פונעם ארט. די גאנצע פלאן איז אים געלונגען א דאנק אן אלטע שוואכקייט אין די שלעסער פונעם יאר 1972 אפטיילונג אינעם טורמע.

זיין פרייהייט האט אבער נישט אנגעהאלטן צו לאנג. פאליציי אפיצירן האבן אים אויפגעכאפט בערך א מייל אוועק פונעם דזשעיל אויף 'דזשאונס ראוד', קוים 30 מינוט נאכדעם וואס מען האט באמערקט זיין אנטלויף. ביים ארעסטירן האט ער אטאקירט אן אפיציר בעפאר מען האט אים באוויזן אראפצוהאלטן און צוריק ארעסטירן. מען האט אים באהאנדלט פאר שניטן וואס ער האט געכאפט פונעם שטעכיגן צוים, און דערנאך איז ער צוריקגעפירט געווארן צו דעם זעלבן צעל פון וואו ער האט אויסגעבראכן.

דער ארעסטאנט שטייט יעצט אויס פרישע קלאגעס, אין צוגאב צו זיינע ארגינעלע קלאגעס פון גנב'ענען א קאר און פארקויפן דראגס. דער לאקאלער שעריף, קעמבאו סטריטער, האט געזאגט אז די אפטיילונג וועט בלייבן אונטער דירעקטע אויפזוכט פון די וועכטער בעת מען גייט איבער די טירן און שלעסער, אנרופנדיג דעם אינצידענט א "ערנסטע זיכערהייט דורכפאל" וואס די דעפארטמענט איז אנטשלאסן צו פאררעכטן.