בס"ד

היסטארישע נסיעה: א ריזן ציבור אין מעקסיקא נעמט אויף די גדולי ישראל לטובת 'קרן עולם התורה'

א ריזיגער ציבור האט זיך פארזאמלט אויף תפילת שחרית אין די 'כתר התורה' שול אין מעקסיקא סיטי, אינאיינעם מיט די גדולי ישראל וועלכע זענען אנגעקומען אויף א געהויבענע נסיעה לטובת דעם 'קרן עולם התורה', און זענען אויפגענומען געווארן מיט גרויס התלהבות דורך די ארטיגע אידישע קהילה.

די חשוב'ע דעלעגאציע איז אנגעקומען קיין מעקסיקא סיטי דעם זונטאג נאך א לאנגע רייזע פון קרוב צו 20 שעה. צווישן די משתתפים אין די נסיעה ציילן זיך הגאון ר' יעקב הלל, הגאון ר' אברהם סאלים, הגאון ר' שמעון גלאי, הגאון ר' יהושע אייכנשטיין און הגאון ר' יוסף חברוני. צו זיי האבן זיך אנגעשלאסן דער לעיקוואודער ראש ישיבה הגאון ר' אריה מלכיאל קאטלער און הגאון ר' ישראל בראג.

דער באזוך איז א טייל פון די אלוועלטליכע קאמפיין דורך 'קרן עולם התורה' צו שאפן שטיצע פאר די ישיבות און כוללים אין ארץ ישראל, אין ליכט פון די שווערע פינאנציעלע מצב און די שניטן וואס פלאגן דעם עולם התורה.

באלד ביים אנקומען זענען די גדולי ישראל אויפגענומען געווארן דורך די ראשי הקהילה, און האבן אנגעהויבן א רייכע סקעדזשועל פון תפילות, אסיפות און מיטינגען מיט לאקאלע נדיבים און תומכי תורה. די נסיעה קומט נאך א רייע באזוכן פון די גדולי ישראל אין פארשידענע אידישע קהילות איבער דער וועלט צו ראטעווען די מוסדות התורה.

לויט ווי די הנהלה פון 'קרן עולם התורה' גיט איבער, שטיצט די ארגאניזאציע אצינד 1,489 ישיבות און כוללים, און ברויך האבן ארום 12 מיליאן דאלאר יעדן חודש צו קענען אנגיין מיט די קריטישע הילף. מעקסיקא איז די לעצטע סטאנציע אין די ווייטערדיגע אינטערנאציאנאלע נסיעות פונעם קרן.

די בילדער פון די 'כתר התורה' שול האבן אפגעשפיגלט א מורא'דיגע מעמד פון כבוד התורה, ווען די ארטיגע אידן האבן זיך צוזאמגענומען מיט די חשוב'ע געסט בשעת זייער הייליגע מיסיע למען עולם התורה בארץ ישראל.