שווערע פייערן ביי סאודי אראביע אויל פאסיליטיס נאך א מאסיווע דראון און מיסיל אטאקע דורך די הוטי רעבעלן

מאסיווע פייערן האבן אויסגעבראכן ביי עטליכע ענערגיע צענטערן אין דרום סאודי אראביע דעם 8'טן סעפטעמבער, נאכדעם וואס די הוטי רעבעלן פון תימן האבן דורכגעפירט א קאארדינירטע כוואליע פון דראון און מיסיל אטאקעס. סעטעלייט בילדער צייגן שווערע רויך וואלקענעס וואס הייבן זיך העכער די 'סאודי אראמקו' פאסיליטיס אין אבהא און די ריפיינערי אין דזשיזאן, וואס מ'קען זען אפילו פון ספעיס.

סאודישע אויטאריטעטן האבן באשטעטיגט אז די אטאקעס האבן געטראפן צילן אין פיר באזונדערע שטעט: אבהא, דזשיזאן, נאדזשראן, און כאמיס מושאיט. די אטאקעס האבן געצילט סיי ענערגיע אינפראסטרוקטור און סיי די 'קינג כאליד' עיר בעיס אין א ברייטע, סימולטאנישע אנגריף. דער סאודישער קאאליציע ווארטזאגער, טורקי אל-מאלקי, האט איבערגעגעבן אז 73 מענטשן זענען פארוואונדעט געווארן, אריינגערעכנט פרויען און קינדער, כאטש ער האט נישט געגעבן צופיל דעטאלן איבער די שווערקייט פון די וואונדן. די סאודישע ענערגיע מיניסטעריום האט באשטעטיגט אז די אפעראציעס ביי די באטראפענע אויל פאסיליטיס זענען צייטווייליג אפגעשטעלט געווארן בעת עמערדזשענסי קרוס האבן געארבעט צו ברענגען די פייערן אונטער קאנטראל.

די דרום ראיאן וואס איז צום מערסטן געטראפן געווארן פון די אטאקעס איז נישט סתם א קליינע טייל פון די סאודישע אינפראסטרוקטור. עס געפינט זיך דארט ריזיגע אויל פאסיליטיס, אריינגערעכנט א ריפיינערי אין דזשיזאן וואס פראדוצירט 400,000 פאסן אויל א טאג און איז פון די גרעסטע אין סאודי אראביע. די פאסיליטי איז שוין געווארן א ציל פאר די הוטים עטליכע מאל אין די לעצטע פאר וואכן אליינס. פייערלעשער האבן נאך געקעמפט מיט די פלאמען דינסטאג אינדערפרי, לויט די ענערגיע מיניסטעריום, בשעת די אויטאריטעטן האבן פרובירט צו שאצן די שאדנס צו די ריפיינערי סיסטעם וואס שפילט א גאר וויכטיגע ראלע אין די לאנד'ס ברענשטאף פראדוקציע און עקספארט. די הוטים האבן ספעציפיש אנגערופן דזשיזאן סיטי אלס איינע פון זייערע הויפט צילן, אראפלייגנדיג עס אלס א מעידזשאר אינדוסטריאלע און לאגיסטישע האב ביים ים סוף.

דער מיליטערישער ווארטזאגער פון די הוטים, יחיא סארי, האט אראפגעשטעלט די אטאקעס אלס נקמה, באשולדיגנדיג סאודי אראביע אין א פריערדיגע עיר-סטרייק וואס האט געטראפן א טורמע אין די דזשאוף פראווינץ אין צפון תימן. ער האט געווארנט אז "יעדע אגרעסיע קעגן אונזער לאנד און פאלק וועט טרעפן א פעסטע רעאקציע." א דעפיוטי הויפט פון די הוטי מידיא אפיס איז געגאנגען נאך ווייטער, לויבנדיג די אטאקעס און דערקלערט אז די צייטן וואס סאודי אראביע קען אטאקירן תימן "אן קיין רעאקציע אדער באצאלן א פרייז" איז פאריבער.

די סאודי-געפירטע קאאליציע האט פון איר זייט שארף פארדאמט די אטאקעס אלס א "געפארפולע" עסקילירונג און צוגעזאגט א שטרענגע ענטפער. די ענערגיע מיניסטעריום האט זיך אונטערגענומען צו נעמען אלע נויטיגע שריט צו באשיצן די פאסיליטיס, ארבייטער, און די ווייטערדיגע אנגייענדע אפעראציעס.

די לעצטע כוואליע אטאקעס איז ווייט פון אן איינמאליגע אינצידענט. עס איז א טייל פון אן אנגייענדע און פארערגערטע מצב פון די לאנג-פארצויגענע ציווילע קריג אין תימן. די הוטים האבן שוין גענומען פאראנטווארטליכקייט אויף עטליכע אטאקעס אויף די אראמקו ריפיינערי אין דזשיזאן אין די לעצטע צוויי מאנאטן, אינאיינעם מיט אטאקעס אויף אנדערע סאודישע ענערגיע צילן ווי יאנבו און נאדזשראן.

יעדע נייע אטאקע ברענגט ארויף פרישע זארגן איבער די זיכערהייט פון די גאלף ענערגיע אינפראסטרוקטור אין א קאנפליקט וואס זעט נישט אויס צו קומען צו אן ענדע. בעת די פייערלעשער קרוס האבן ווייטער געארבעט דינסטאג צו קאנטראלירן די פייערן און אפשאצן די שאדנס, האבן די אטאקעס אונטערגעשטראכן ווי ווייט די קריג אין תימן קען נאך דערגרייכן טיף אריין אין סאודישע טעריטאריע, וואס סטראשעט נישט נאר די לאקאלע סטאביליטעט, נאר אויך א קריטישע טייל פון די גלאבאלע ענערגיע סופליי טשעין.