חוטי רעבעלן ברעכן זיך אריין און נעמען איבער דעם עסטעיט פונעם פארלאמענט ספיקער
גאלערי
ווידעאס
תימן: געוואפנטע חוטי רעבעלן נעמען איבער דעם פראכטפולן מאנסיאן פונעם ספיקער פון די תימן'ער פארלאמענט
פרישע ווידעא קליפס וואס צירקולירן היינט צייגן ווי געוואפנטע חוטי קעמפער דרייען זיך פרייליך ארום אינעווייניג און אינדרויסן פונעם ריזיגן פראכטפולן מאנסיאן פון סולטאן אל-באראקאני, דער סאודי-געשטיצטער ספיקער פון די תימן'ער רעפרעזענטאנטן הויז זינט יאר 2019.
די פראפערטי געפינט זיך אין די טאיז פראווינץ, א ראיאן וואס איז פארוואנדלט געווארן אין איינע פון די הייסטע פראנטן אין די באנייטע ציווילע קריג אין תימן. באריכטן באשטעטיגן אז די חוטים האבן היינט איבערגענומען דעם גאנצן עסטעיט אלס א טייל פון א ברייטערע אפענסיווע אין ריכטונג פון די שטאט אל-טורבא, אינאיינעם מיט העפטיגע שלאכטן וואס האבן אויסגעבראכן אין די ארומיגע דערפער. אל-באראקאני איז יעצט נאך א נאמען צו די וואקסנדע ליסטע פון רעגירונגס-אפישעלס וועמענס היימען זענען אריינגעפאלן אין די הענט פון די רעבעלן.
דאס איז אבער נישט קיין איינצלינער אינצידענט. די חוטים האבן א לאנגע היסטאריע פון שטורעמען און קאנפיסקירן היימען פון געזעצגעבער און באאמטע וואס זענען לאיאל צו די אפיציעלע תימן'ער גאווערנמענט. אבער נאך וויכטיגער, צייגט דאס וויפיל טעריטאריע די טעראר גרופע מאכט אין צענטראל תימן, וואו אירע קעמפער רוקן זיך פאראויס צו די שטאט טאיז זעלבסט, און סטראשען אפצוהאקן די שטאט פון די רעגירונגס-קאנטראלירטע שטחים אין דרום.
אין די צייט וואס סאודי אראביע און אירע אליאירטע קראפטן פרובירן צו טרעפן אן ענטפער צו די מצב, איז דער פאל פונעם ספיקער'ס מאנסיאן א קלארער סימבאל ווי שוואך די רעגירונגס קאנטראל אויפן ראיאן איז געווארן.