Loading

הונדערטער מיליאנען דאלארן אין אויל גניבות: איראק האט אויפגעדעקט א שמוגל נעטווארק אין א פעסטונג פון איראן-געשטיצטע מיליציעס

י"א כסלו תשפ"ז

0 1
Main image for הונדערטער מיליאנען דאלארן אין אויל גניבות: איראק האט אויפגעדעקט א שמוגל נעטווארק אין א פעסטונג פון איראן-געשטיצטע מיליציעס

ווידעאס


בס"ד


איראק: מאסיווע אויל-שמוגלעריי אפעראציע אויפגעדעקט; הונדערטער מיליאנען דאלארן גע'גנב'עט דורך איראן-געשטיצטע טעראר גרופעס


איראקע אויטאריטעטן האבן אויפגעדעקט קלארע באווייזן פון א מאסיווע אויל-שמוגלעריי אפעראציע אין די 'דזשורף אל-סאכאר' ראיאן אין די באביל פראווינץ, וואו אויספארשער זאגן אז פארברעכער האבן זיך אומלעגאל אריינגעכאפט אין א רעגירונג'ס פייפליין און ארויסגעזויגן רויע אויל אין א געשאצטע ווערט פון הונדערטער מיליאנען דאלארן.


די אויספארשונג קאנצענטרירט זיך ארום א 26-אינטש פייפליין וואס טראגט טעגליך אריבער אמווייניגסטנס 200,000 פעסלעך רויע אויל. לויט די באריכטן האבן די שמוגלער דורכגעלעכערט דעם רער און ארויסגעזויגן דעם אויל דירעקט אין באהאלטענע גרובן און אונטערערדישע איינריכטונגען. זיכערהייט באאמטע האבן איבערגעגעבן פאר די 'רויטערס' נייעס אגענטור אז די אויספארשער האבן געפונען באהאלטענע פאמפינג עקוויפמענט אינעווייניג אין גרויסע הענגערס, ווי אויך א ספעציעלע סיסטעם אנצופילן די טענקערס אויף אן אופן וואס זאל נישט קענען ווערן אויפגעכאפט דורך דראונס אדער העליקאפטערס פון די לופטן, און אפילו א קליינע געהיימע רעפיינערי וואס האט אפערירט אין די געגנט. די גאנצע אפעראציע איז לויט די שאצונגען אנגעגאנגען נאך זינט יאר 2021.


אויספארשער זענען חושד אז די גאנצע אפעראציע איז אנגעפירט געווארן דורך 'קאטאיב חיזבאלא', אן איראן-געשטיצטע טעראר גרופע וואס האט א שטארקע איינפלוס אין די געגנט, און ווערט באשולדיגט אין אנפירן א ברייטע שמוגלעריי נעצווערק מיט די הילף פון קארופטירטע זיכערהייט און אויל-סעקטאר באאמטע. די אויפדעקונגען האבן געפירט דערצו אז דער איראקער פרעמיער מיניסטער, עלי אל-זיידי, האט אונטערגענומען א שטרענגע קראקדאון, אויפזאגנדיג ניין הויכראנגיקע זיכערהייט און אדמיניסטראטיווע באאמטע, און האט פארארדנט אז די פארדעכטיגטע זאלן געברענגט ווערן אין געריכט.


די אויספארשונג האט אויך ארויסגעברענגט א ברייטערע געראנגל איבער די רעגירונג'ס אויטאריטעט אין דזשורף אל-סאכאר, א סטראטעגישע ראיאן דרום פון די הויפטשטאט באגדאד, וואס געפינט זיך שוין יארן לאנג אונטער די קאנטראל פון באוואפנטע מיליציעס. איראקע אויטאריטעטן האבן אנגעהויבן פארשטארקן די זיכערהייט ארום די דיסטריקט צו באשיצן די קריטישע אויל אינפראסטרוקטור.


אין די זעלבע צייט האבן פארלאמענטארישע אויספארשער איבערגעקוקט בילדער, דאקומענטן און סעקיוריטי קאמערע ווידעאוס וואס דאקומענטירן די פארדעכטיגטע טראק באוועגונגען. איין פארלאמענט אויספארשער האט איבערגעגעבן אז ארום 25 טענקער טראקס, וואס יעדער פון זיי קען ארייננעמען 36,000 ליטער אויל, זענען געווען אריינגעמישט אין די אפעראציע.


פון איר זייט האט 'קאטאיב חיזבאלא' געלייקנט סיי וואספארא פארבינדונג צו אויל שמוגלעריי, טענה'נדיג אז די איינריכטונגען אין די געגנט זענען בלויז צו צושטעלן ברענשטאף פאר זייערע אייגענע קארס און דזשענערעיטארס. זיי האבן אראפגעריסן די רעגירונג'ס קאמפיין אלס א פרואוו צו לייגן דרוק אויף די גרופע זיי זאלן אויפגעבן זייערע וואפן.


די באשולדיגונגען האבן פארשטארקט די זארגן איבער די שטארקע איינפלוס וואס איראן-געשטיצטע מיליציעס האבן אויף איראק'ס ענערגיע סעקטאר, און די ריזיגע פארלוסטן פון פובליק געלטער דורך די אומלעגאלע אויל גניבות. מיט די אויספארשונג וואס גייט נאך אן און די רעגירונג וואס זוכט צוריקצובאקומען קאנטראל, קען דער קעיס ווערן א הויפט פראבע אויף באגדאד'ס מעגליכקייט זיך צו ספראווען מיט מעכטיגע באוואפנטע נעצווערק וואס אפערירן אינעווייניג אין לאנד'ס סטראטעגישע אויל אינפראסטרוקטור.