קראון הייטס: שומרים ווארנט איבער א 'דענט' סקעם וואס צילט לאקאלע דרייווערס

די קראון הייטס שומרים ארגאניזאציע בעט פון לאקאלע דרייווערס צו זיין פארזיכטיג, נאך באריכטן אז מענער דרייען זיך ארום אין די געגנט און אפערירן פאר בייפארענדע קארס צו פאררעכטן 'דענטס' אויף זייערע אויטאס.

לויט ווי שומרים גיט איבער, פארן צוויי מענער ארום אין א רויטע 'סעדאן' קאר און שטעלן אפ מענטשן אויפ'ן גאס, אנגעבנדיג אז זיי קענען פאררעכטן די דענטס פאר עטליכע הונדערט דאלאר. אין געוויסע פעלער איז באריכטעט געווארן אז א קינד געפינט זיך מיט זיי אין קאר.

די שווינדלער נוצן א 'ספרעי און סענדינג' טעכניק, און זאגן פאר די דרייווערס אז מען וועט זען די רעזולטאטן ביז 24 שעה. שומרים ווארנט די איינוואוינער זיך נישט אפצושטעלן ביי זיי און זיכער נישט איבערגעבן קיין געלט, אנווייזנדיג אז די אזוי-גערופענע 'פאררעכטונג' קען פאקטיש אנמאכן נאך מער שאדן צום קאר.

שומרים וואלאנטירן האבן שפעטער אפגעשפירט די פארשוינען און זיי קאנפראנטירט, און באלד דערנאך האבן די מענער פארלאזט די קראון הייטס געגנט. די שומרים טעכנאלאגיע אפטיילונג האלט ווייטער אן אויג אויף די סיטואציע און מאניטארט די גאסן, אין פאל זיי באשליסן צוריקצוקומען אין די געגנט.

שומרים בעט אז ווער עס איז נאר צוגעטרעטן געווארן דורך די פארשוינען אין פארבינדונג מיט דעם סקעם, זאל זיך פארבינדן מיט זייער 24-שעה האטליין אויף 718-774-3333. אין פאל פון אן עמערדזשענסי זאל מען רופן 911.